Ağ Ev "Fitch"in ABŞ-ın xarici valyutada emitentin uzunmüddətli defolt reytinqini AAA-dan AA+ səviyyəsinə endirmək qərarı ilə razılaşmır. 

Valyuta.az xəbər verir ki, bu barədə Ağ Evin mətbuat katibi Karine Jan-Pyerin bəyanatında deyilir.

"Biz bu qərarla qəti şəkildə razılaşmırıq. Prezident Co Baydenin dünyanın ən güclü iqtisadiyyatlarından birində ən böyük bərpaya nail olduğu zamanda reytinqin aşağı salınması reallığa ziddir", deyə Ağ Ev rəsmisi bildirib.

ABŞ-ın maliyyə naziri Canet Yellen də reytinq agentliyinin qərarı ilə razılaşmadığını bildirib.

Reytinqin aşağı salınması növbəti üç il ərzində fiskal vəziyyətin daha da pisləşəcəyi gözləntiləri, artmaqda davam edən yüksək borc yükü, həmçinin son iki onillikdə idarəolunma qabiliyyətinin pisləşməsi və bu, dövlət borcunu məhdudlaşdırmaq və bu mövzuda son anda qərarlar verməyin nəticəsidir.

İyun ayında ABŞ prezidenti Co Bayden milli borc tavanının 2025-ci il yanvarın 1-dək artırılması haqqında qanunu imzalayıb. Bayden bunun ölkənin iqtisadi çöküşünün qarşısını almağa kömək etdiyini deyib. O qeyd edib ki, hakimiyyət diqqəti sosial təminat və infrastruktur investisiyalarına yönəltmək üçün xərcləri və kəsirləri azaldır.

"Fitch Ratings Inc." ilk növbədə reytinq agentliyi kimi tanınan Amerika korporasiyasıdır. "Standard & Poor's" və "Moody's" ilə yanaşı, beynəlxalq reytinq agentliklərinin "Böyük üçlük" adlanan birliyinə daxildir.

Paşa Məmmədli