Dünya Bankının Azərbaycan üzrə ölkə meneceri Sara Maykl bildirib ki, Azərbaycanda əmanətlərin yalnız 10 faizi banklarda saxlanılır. Deməli ölkədə depozitlərin faktik həcmi daha çox olmasına baxmayaraq, onun ən yaxşı halda 1/10 hissəsi bankların ixtiyarına verilib.

İqtisadçı ekspert Natiq Cəfərli Valyuta.az-a açıqlamasında bildirib ki, əmanətlərin əsas hissəsinin banklarda olmamasına təsir edən amil əhalinin banklara olan güvəninin aşağı olması ilə bağlıdır:

“Azərbycanda banklarda 10 milyard manata yaxın əmanət var. Dünya Bankının Azərbaycan üzrə ölkə menecerinin açıqlamasından belə çıxır ki, əhalidə 90 milyard manata yaxın əlavə pul da var. Bu bir o qədər də inandırıcı gəlmir. Həcmin nə qədər olması dəqəq bəlli olmasa da, sözsüz ki, “yastıq altında”da müəyyən vəsaitlər yatır. Belə vəziyyətin yaranmasına dalğavari şəkildə zaman-zaman bəzi bankların bağlanması öz təsirini göstərib. 2015-ci ilin devalvasiyasından sonra həmin proses daha da sürətlənib. Məhz bankların bağlanması və əmanətçilərin əmanətlərinin geri qaytarılmasında problemlərin olması insanları bank sistemindən müəyyən dərəcədə soyudub. Keçən il həmçinin əmənatələrdən əldə olunan gəlirə 10 faizlik vergi tətbiq olundu. Belə vəziyyətdə insanlar riskə getməyərək, əmanətləri evdə saxlamağa üstünlük verir. İnsanların manata olan güvəni artsa da, ümimilikdə alt şüurda gözlənti var ki, türk lirəsi, rus rublu dəyərdən düşdüyü kimi, gec-tez manatla bağlı da anoloji proseslər yaşana bilər. Bu amilin özü də bəzi insanların əmanətlərini bankda deyil, evdə saxlamağa üstünlük vermələrinə təsir göstərir”. 

Ramiz