“Kriptovalyuta həddən artıq riskli investisiya alətidir və bildiyimiz ən yüksək riskə malik investisiya istiqamətidir”. 

Bu sözləri Valyuta.az-a iqtisadçı Xalid Kərimli Azərbaycanda kriptovalyutalara marağın az olması, bu sahədə olan risklər haqqında danışarkən deyib.

İqtisadçı bildirib ki, kriptovalyutanın daxili dəyəri yoxdur. Onun dəyəri hər növbəti alıcının ödəməyə hazır və razı olduğu pulun qiyməti ilə müəyyənləşir:

“Yəni hansısa aktivə, hər hansı istehsalla satışa bağlı bir məsələ deyil, onun sadəcə mübadilə dəyəri var. Yəni bunu kimsə alırsa, bunun dəyəri var, almırsa dəyəri sıfıra da düşə bilər. Bu o deməkdir ki, hətta bəzi kriptovalyuta növlərində sıfıra da düşüb və çox böyük zərərə uğrayıblar. Yəni burada udan varsa, deməli, uduzan da var. Prosesin mahiyyəti budur”. 

“Azərbaycanda kriptovalyuta niyə maraq azdır” sualına cavab olaraq iqtisadçı bildirib ki, burada bir neçə müxtəlif səbəb var:

“Həddən artıq riskli instrumentdir. İkincisi, insanların maariflənmə səviyyəsi də o qədər deyil. Üçüncüsü, Azərbaycanda, ümumiyyətlə, qanunvericiliklə kriptovalyutaya investisiya qoymaq imkanları məhduddur. Yəni bank hesabından kriptovalyuta ala bilməzsiniz, belə bir imkanınız yoxdur. İstiqraz ala bilərsiniz daşınmaz əmlak ala bilərsiz xaricdə amma kriptovalyuta almaq üçün “binance” “coinbase” də “kaşlok” yaratmalısınız. Dolayısı yolla belə həmin hesaba vəsaitlər göndərməlisiniz və məhdud sayda aylıq limitə uyğun olaraq almaq olar. Bu çox mürəkkəb məsələdir”.

Xalid Kərimli əlavə edib ki, burda çoxlu məhdudlaşdırıcı məsələlər, narahatlıqlar, risklər var. Bu mexanizmi hamı qura bilmir:

“Bu sistemi məhdud sayda adamlar qura bilər. Çünki prosesdə çətin risklər çoxdur. Bu kriptovalyutaların dəyəri sıfır da ola bilər. İkiqat qalxa bilərmi, qalxar, amma eyni zamanda da dəyəri sıfır ola bilər”.

Xalid Kərimli bildirib ki, ən böyük risklərdən biri də hələlik bir çox böyük ölkənin Mərkəzi Bankının kriptovalyutanı ödəniş forması kimi qəbul etməməsidir:

“Çünki onlar bunu özlərinə rəqib kimi görür. Kriptavalyuta bazarı imkan verir ki, dövlətin nəzarət qurumlarından kənarda ödəniş həyata keçirə biləsən. Elə dövlətləri də narahat edən odur ki, onların nəzarətindən ödəniş etmək imkanları formalaşır və bu da onları narahat edir".

Davud