Avropa İttifaqı (Aİ) Çinin "Huawei" və "ZTE" şirkətlərinə daxili telekommunikasiya şəbəkələrində qadağa qoyacaq.

Valyuta.az xəbər verir ki, Avropa İttifaqının Daxili Bazar və Sənaye Komissiyasının üzvü Tyerri Breton Brüsseldə keçirdiyi mətbuat konfransında kibertəhlükəsizlik və 5G şəbəkələri ilə bağlı açıqlamalar verib. 5G şəbəkə təhlükəsizliyinin Avropa üçün çox vacib olduğunu bildirən Breton, bunun enerji, nəqliyyat, səhiyyə, maliyyə və bütün əlaqəli sektorlar üçün kritik infrastruktur olduğunu izah edib.

Aİ-nin 2020-ci ilin əvvəlində 5G şəbəkələrinin təhlükəsizliyi ilə bağlı tədbirləri özündə əks etdirən “alətlər qutusu”nu yekdilliklə qəbul etdiklərini xatırladan Breton, üzv dövlətlərə və telekommunikasiya operatorlarına kəşfiyyat və məlumatlarla bağlı yüksək riskli təchizatçıların avadanlığının istifadəsini məhdudlaşdırılmasını və ya qadağasını tövsiyə edib. Bu tövsiyələrin son üç ildə əksər Aİ-na üzv dövlətlərinin qanunvericiliyinə daxil olduğuna diqqət çəkən Breton, "Üzv dövlətlər artıq təhlükəsizlik risk analizi əsasında 5G şəbəkə təchizatçılarını məhdudlaşdırmaq və ya xaric etmək qərarı verə bilərlər" - ifadələrini işədib.

Avropa İttifaqına daxil olan 10 ölkənin bu günə qədər yüksək riskli 5G şəbəkə texnologiyası satıcılarını məhdudlaşdırmaq və ya qadağa qoymaq səlahiyyətlərindən istifadə etdiyini bildirən Breton, "Bu, çox yavaşdır və böyük təhlükəsizlik riski yaradır" - deyib.

Aİ ölkələrinin bu gün 5G təhlükəsizlik alətlər qutusunun tətbiqinə dair ikinci hesabatı yekdilliklə qəbul etdiklərinə diqqət çəkən mütəxəssis, komissiyanın "Huawei"lə "ZTE"ni 5G şəbəkələrindən məhdudlaşdırmaq, yaxud tamamilə istisna etmək qərarının əsaslı və məqsədəuyğun olduğunu bildirib. Breton bildirib ki, 5G şəbəkələrində yüksək riskli təchizatçıların əvəz edilməsi prosesi sürətləndirilməlidir: "Komissiya "Huawei" və "ZTE"yə məruz qalmamaq üçün telekommunikasiya xidmətlərinin təqdimatında "5G alətlər qutusu" prinsipini tətbiq edəcək." Breton, silah kimi istifadə edilə bilən kritik asılılıqları qoruyub saxlaya bilməyəcəklərini vurğulayıb.

Son zamanlar bir çox ölkələr təhlükəsizlik baxımından Çin texnologiya şirkətlərinə qarşı müxtəlif tədbirlər görüb.

"Huawei" və "ZTE" kimi 5G texnologiyası üzrə ixtisaslaşmış şirkətlərə ABŞ, Avstraliya, Yaponiya, Hindistan və Kanadada şəbəkələrdə avadanlıq quraşdırmaq qadağan edilib. Böyük Britaniya 2027-ci ilə qədər "Huawei" tərəfindən quraşdırılmış avadanlıqların 5G şəbəkələrindən çıxarılmasını tələb edib.

Elmir