Almaniya Bundesliqası nəhənglərindən olan Dortmund "Borussiya"sı son illərdə transferlərdəki uğurları ilə diqqət çəkir. Bir çox gənc istedadları yüksək səviyyəyə çatdıran klub onlardan pul qazanmağı da bacarır. Getdikcə futbolçu fabrikinə çevrilən "Borussiya"nın son uğuru Cude Bellinqemlə bağlı oldu. 

Böyük perspektiv vəd edən gənc futbolçu 103 milyon avro qarşılığında Madrid "Real"ına satıldı. Bu satışdan sonra Cude ən bahalı gənc ingilis futbolçu kimi klubun tarixinə düşdü. 2020-ci ildə "Birmingem"dən 30 milyon avroya transfer edilən 19 yaşlı yarımmüdafiəçi astronomik qiymətə "Real"a satıldı. Bundesliqadakı çıxışı ilə gənc yaşda Avropa nəhənglərini öz arxasınca salan Bellinqhem üçün "Real"ın möhtəşəm təklifi Dortmund təmsilçisinin uğurlarına daha biri yenisini əlavə etdi. 

İllər öncə Ceydon Sanço, Kristian Pulişiç, Pyer-Emerik Aubameyanq, Ousmane Dembele və Erlinq Haland kimi futbolçuları yetişdirib baha qiymətə satan klub Bellinqemin də satışından böyük gəlir qazandı. Ümumiyyətlə son illərdə "Borussiya"nın yetişdirdiyi və baha qiymətə satdığı futbolçuların ümumi dəyərini hesablasaq, klubun xəzinəsinə təxminən 707 milyon avro daxil olduğunu görə bilərik. Rekord satış siyahısında ilk pillədə Ousmane Dembele yer alır. "Barselona"ya 135 milyon avroya satılan Dembele 2016-cı ildə "Renn"dən 35 milyon avroya transfer olunmuşdu.

Valyuta.az "Borussiya"nın digər klublara satdığı ən bahalı futbolçuların siyahısını təqdim edir.

Ousmane Dembele  - 135 milyon avro ("Barselona", İspaniya)
Cude Bellinqem - 103 milyon avro ("Real", Madrid, İspaniya)
Ceydon Sanço - 85 milyon avro ("Mançester Yunayted", İngiltərə)
Kristian Pulişiç - 64 milyon avro ("Çelsi", İngiltərə)
Pyer-Emerik Aubameyanq - 64 milyon avro ("Arsenal", İngiltərə)
Erlinq Haland - 60 milyon avro ("Mançester Siti", İngiltərə)
Henrix Mxitaryan: 42 milyon avro ("Mançester Yunayted", İngiltərə)
Mario Götze - 37 milyon avro ("Bavariya", Almaniya)
Mats Hummels - 35 milyon avro ("Bavariya", Almaniya)
Abdu Diallo - 32 milyon avro (PSJ, Fransa)
İlkay Gündoğan - 27 milyon avro ("Mançester Siti", İngiltərə)
Pako Alkaser - 23 milyon avro ("Vilyareal", İspaniya)

Elmir