"Ermənistanla Türkiyə arasında keçid məntəqəsinin açılması Ermənistanın müəyyən formada blokadadan çıxmasına səbəb olacaq. Bu da Ermənistan iqtisadiyyatının inkişafına müəyyən təkan verəcək”. 

Bu sözləri Valyuta.az-a İqtisadi və Sosial Araşdırmalara Yardım İctimai Birliyinin sədri Eyyub Kərimli Türkiyə-Ermənistan arasında iyulun ikinci yarısında “Marqara” nəzarət-keçid məntəqəsinin açılmasının mümkünlüyü haqqında danışarkən deyib.

İqtisadçı bildirib ki, 30 ilə yaxın idi Ermənistanın işğalçılıq siyasəti davam edirdi, buna görə də blokadaya alınmışdı:

“Hətta bir dəfə Azərbaycan Prezidenti İlham Əliyev yaxşı bir fikir söyləmişdi: "Biz Ermənistan iqtisadiyyatını dalana çevirmişik”. Ermənistan dalan vəziyyətinə düşmüşdü, İrandan başqa heç bir qonşusu və Rusiya ilə də Gürcüstan üzərindən iqtisadi əlaqəsi var idi. Onun Rusiya ilə Gürcüstan üzərindən əlaqəsi isə çox çətindir, hətta qış aylarında keçilməz olur".

Eyyub Kərimli bildirib ki, Türkiyənin iqtisadi əlaqələri bərpa olunacaq, Ermənistanla əlaqələri genişlənəcək:

“Bu da gələcəkdə Azərbaycan-Ermənistan münasibətlərinə müsbət təsir göstərəcək. Çünki Türkiyənin Ermənistana həm də iqtisadi təzyiq imkanları artacaq. İqtisadi mübadilə yaranandan sonra Ermənistan Türkiyədən asılı vəziyyətə düşəcək, xarici ticarət dövriyyəsi yaranacaq. Gələcəkdə Türkiyə bundan təzyiq vasitəsi kimi istifadə edəcək. Ermənilər düşünməlidir ki, Zəngəzur dəhlizinin açılması onların da iqtisadiyyatına müsbət təsir edəcək, hazırki ağır durumdan çıxaraq geniş iqtisadi inteqrasiya, dividentlər əldə edəcək”.

Davud