Birləşmiş Millətlər Təşkilatı (BMT) Kanadada meşə yanğınlarından çıxan tüstünün Nyu York və ABŞ-ın digər şəhərlərini bürüdüyünü bildirib. 

Valyuta.az xəbər verir ki, BMT-nin sözçüsü Stefan Dujarrik gündəlik mətbuat konfransında məsələ ilə bağlı danışıb.

Kanadadakı meşə yanğınlarının insanların səbəb olduğu iqlim böhranına bağlı olub-olmaması ilə bağlı hələ heç bir izahat olmadığını qeyd edən Dujarrik, havanın çirklənməsinin ümumiyyətlə insan fəaliyyəti ilə əlaqəli olduğunu deyib.

Dujarrik bildirib ki, Kanadada baş verən yanğınlar həm də iqlim ekspertləri və alimlərin temperaturun artması ilə bağlı xəbərdarlıqları ilə bağlıdır.

BMT-nin baş katibi Antonio Quterreşin davamlı olaraq qalıq yanacaqlardan istifadənin azaldılmasının vacibliyini vurğuladığını xatırladan Dujarrik, dünyanın paytaxtı olan Nyu-Yorkda belə bir hadisənin şahidi olmağın insanları səfərbər edəcəyinə ümid etdiyini qeyd edib.

Dujarrik bildirib ki, son 20 ildə ilk dəfə havanın keyfiyyəti pis olduğu üçün BMT bayraqları endirilib.
 
"Bu və dünyanın bir çox yerində pis hava şəraiti iqlim böhranının simvoludur", deyə BMT rəsmisi üeyd edib.

Quterreş isə sosial media hesabından paylaşdığı foto mesajında "Nyu Yorkdakı mərkəzimizdə Kanadada baş verən yanğınlar səbəbindən pis hava şəraitinin təsirini hiss edirik. Qlobal istiləşmə artdıqca, meşə yanğınlarını azaltmaq həyati əhəmiyyət kəsb edir. Təbiətlə barışmalıyıq, təslim olmamalıyıq”, yazıb.

Paşa Məmmədli