Mərkəzi Bankın sədri Taleh Kazımov Milli Məclisin İqtisadi siyasət, sənaye və sahibkarlıq komitəsinin iclasında çıxışı zamanı Azərbaycanda fəaliyyət göstərəcək xarici banklarla bağlı bəzi şərtləri açıqlayıb. 

AMB sədri çıxışında, hər hansı xarici bankın ölkəyə gəldiyi təqdirdə strategiyasının olmasının vacib olduğunu diqqətə çatdırıb. 
 
"Kiçik, orta sahibkarlığa dəstək, koorporativ, investisiya bankı olması çox maraqlıdır. Bu, birinci şərtdir. İkinci məsələsə, bizə hansı innovativ həllər gətirirlər? Ölkəmizin maliyyə, makroiqtisadi sabitliyinə xələl gətirmədən, siyasi problemlər yaratmadan, xarici bankların, sığorta və investisiya şirkətlərinin Azərbaycanda fəaliyyətini müzakirə etməyə şad olarıq”.

Qaynarinfo-ya açıqlamasında iqtisadçı ekspert Natiq Cəfərli bildirir ki, xarici banklar üçün strategiyanın olması vacibdir, amma şəraitin olması və yaxşılaşdırılması daha vacibdir:

“Azərbaycana xarici bankların gəlməsi üçün ilk növbədə şərait yaxşılaşdırılmalıdır. Müəyyən strateji addımların, hesablamaların olması da vacibdir. Ölkədəki maliyyə sabitliyinə təsir göstərə biləcək amilləri nəzərə almaq Mərkəzi Bankın vəzifə borcudur. Lakin dediyim kimi, əsas  şəraitin olmasıdır. Bunun üçün də Mərkəzi Bank əlində olan alətlərdən istifadə edə bilər. Xarici bankların bazara daxil olmaları üçün qanunvericilikdə olan bəzi maneələr aradan qaldırılmalıdır.  Bu isə artıq qanunverici hakimiyyətin işidir. Bunun üçün də Rəqabət Məcəlləsi qəbul olunmalı, rəqabətli mühit yaradılmalıdır. Bazara daxil olarkən lisenziyalaşma ilə bağlı yaradılan bəzi süni əngəllər aradan götürülməlidir. Eyni zamanda, zəmanət qanunları da qəbul edilməlidir ki, xarici banklar Azərbaycanda yerli banklarla eyni qaydada fəaliyyət göstərə bilsin. Bütün bunlardan sonra onların fəaliyyət strategiyası ilə bağlı Mərkəzi Bank hansısa bir yol xəritəsi qəbul edə bilər”. 

Rüfət