Qlobal düyü bazarı son 20 ilin ən böyük tədarük çatışmazlığı ilə üzləşib.

“Bloomberg” xəbər verir ki, düyü istehsalında azalma bütün regionlarda, o cümlədən Çin, ABŞ və Avropa Birliyində müşahidə edilir. 

"Fitch Solutions" beynəllxaq reytinq agentliyinin araşdırmasına əsasən, 2023-cü ildə qlobal düyü bazarında son iyirmi ilin ən böyük qıtlığı qeydə alınacaq. Analitiklər bildiriblər ki, dünyanın ən çox yetişdirilən taxıl məhsullarından biri üçün bu böyüklükdə kəsir əsas idxalçılara zərər verəcək. 

“Fitch Solutions”ın əmtəə üzrə analitiki Çarlz Hart deyib ki, qlobal səviyyədə qlobal düyü kəsirinin ən böyük mənfi təsiri qiymətlərdə özünü göstərəcək:

“Hazırda mövcud qiymətlər son 10 ilin ən yüksək qiymətləridir. Düyü qiymətləri 2024-cü ilə qədər hazırkı yüksək səviyyələrdə qalacaq”. 

Hesablamalara görə, 2022-2023-cü illər mövsümündə qlobal düyü tədarükündə kəsir 8,7 milyon ton olacaq. Bu, 2003-2004 mövsümündən bəri ən böyük kəsir olacaq. Həmin mövsümdə 18,6 milyon ton kəsir yaranmışdı.

Qeyd edək ki, Azərbaycan da düyüyə olan tələbatının böyük hissəsini idxal hesabına təmin edilir. Bu səbəbdən qlobal səviyyədə düyü qiymətlərində artım Azərbaycana da sirayət edəcək.