Dünyanın heç bir ölkəsində pul yastığın, yorğanın, döşəyin içində saxlanılmır. Azərbaycan analoqu olmayan yeganə ölkədir ki, bu ölkədə insanlar banklardan daha çox yastığa, yorğan-döşəyə inanırlar. Bunun da müəyyən haqlı səbəbləri var:

1. Nə qədər pulunun olduğunu heç kim bilməyəcək.

2. Vəzifədə qohumun olmadığına və pulunun olduğunu heç kəs bilmədiyinə görə heç bir qurum tərəfindən narahat edilməyəcəksən...

3. Bankda nə qədər pulun varsa, müəyyən dairələrdə haqqında o qədər məlumatlar dolaşacaq.

4. Azərbaycanda səhm bazarının olamamasına görə, ən yaxşı səhm pulu evdə: dollar və ya qızıl şəklində saxlamaqdır. 

5. Bankda saxlanılan puluna görə dövlətə əlavə vergi verəcəksənsə, evdəki pula görə bu vergidən azadsan...

İndi bu bəndləri oxuyarkən ağlınızdan belə bir fikir keçdi: Ölkəmizdə nə baş ayaq qanunlar var, eləmi?

Bəs bu qanunla kim pulunu banka qoyar?

Fikrimcə, məcbur qalmayan heç kim. Bank onsuz da sən qoyduğun puldan yetərincə pul qazanırsa, dövlət iqtisadiyyatın torpedosu rolunu oynayırsa, hökumət niyə vətəndaşın bankdakı pulundan vergi faizi tutmalıdır? Bu cür  qanunu yalnız iqtisadi bilikləri olmayanlar hazırlaya bilər.

Niyə belə qanun hazırlanıb sualına iqtisadçı Vüqar Bayramovun cavabı o olub ki, banklarda olan əmanətlər 2016-cı il fevralın 1-dən etibarən 7 (yeddi) il müddətində vergidən azad edilmişdi. Bu müddət sabah başa çatır.  “Vergi Məcəlləsi”nə edilən son dəyişikliklərdə bu maddə üzrə güzəşt müddətinin uzadılması nəzərdə tutulmayıb. Bu  da o deməkdir ki, əgər bu maddədə düzəliş edilməyəcəksə, o zaman sabahdan əmanətlərə vergi hesablanacaq".

Ona görə də yaşasın yastıq və yorğan-döşəkdəki pullar...

Elmar Hüseynov