Bu gün ABŞ-ın Federal Ehtiyat Sisteminin (FED) Açıq Bazar Əməliyyatları Komitəsinin (FOMC) iki günlük iclası start götürür. İclasın sonuncu günündə uçot dərəcəsinə yenidən baxılacaq.

“Report”un analitik qrupu hesab edir ki, FED uçot dərəcəsinin artım tempini azaldacaq. Belə ki, ardıcıl olaraq dörd dəfə uçot dərəcəsinin 0,75 faiz bəndi həddində artırılmasının ardından bu dəfə uçot dərəcəsi 0,50 faiz bəndi artırılacaq. Bununla da uçot dərəcəsinin 4,25-4,50 %-ə çatacağı gözlənilir.

Ötən ay üzrə ABŞ əmək bazarına dair açıqlanan göstəricilərə görə, əmək haqqının ödənilməsi fondunun artması və işsizliyin azalması prosesi gedir. Yəni FED-in hədəflədiyinin əksinə olaraq iqtisadi aktivlik azalmaq yerinə artır. Bu nəticə etibarı ilə inflyasiyanın artmasını və onun hədəflənən səviyədən yuxarı olmasını stimullaşdırır. Paralel olaraq enerji daşıyıcılarının qiymətlərinin aşağı düşməsi inflyasiyanın artım tempinin düşəcəyinə inamları artırır. Bu mənada bu gün açıqlanacaq inflyasiya göstəriciləri mühüm əhəmiyyət kəsb edəcək. Belə ki, bu ilin oktyabrında baza inflyasiya (ərzaq və yanacaq qiymətləri daxil deyil) 6,3 %-ə çatdı. Noyabrda bu göstəricinin 6,1 %-ə kimi zəifləyəcəyi gözlənilir. ABŞ-da qiymətlərin artım tempinin zəifləməsi investorların optimizmini artıracaq. Bu faktor FED-in aqresiv pul-kredit siyasətinin tempini zəiflədə bilər. İnflyasiyanın aşağı düşməsi və tənzimləyici tərəfindən uçot dərəcəsinin artım tempinin azaltması ABŞ dollarının digər valyutalar qarşısında ucuzlaşdıra bilər. Belə ki, daha əvvəl oktyabr üzrə inflyasiyanın gözləntilər altında olması ABŞ dollarının dəyər itirməsinə gətirib çıxardı.

Buna baxmayaraq gələn ilin sonuna kimi uçot dərəcəsinin endirilmə prosesinə start verilməyəcək. FED inflyasiyanın tempini aşağı salanadək hazırda sərgilədiyi siyasətini davam etdirəcək. Uçot dərəcəsi gələn il pik həddinə (5 -5,25 %) çatandan sonra inflyasiyanı soyutmaq üçün bir müddət həmin həddə qalacaq. Tənzimləyicinin uçot dərəcəsinin artım dövrünü gələn ilin ikinci rübündə dayandıracağı, uçot dərəcəsinin enmə prosesinin isə 2024-cü ilin birinci yarısından sonra başlayacağı gözlənilir.

Xatırladaq ki, FED martda 2018-ci ildən bəri ilk dəfə olaraq uçot dərəcəsini 0,25 faiz bəndi artıraraq illik 0,25-0,5 %-ə çatdırdı. Mayda uçot dərəcəsi 0,50 faiz bəndi artırılaraq 0,75-1 %-ə, iyunda 0,75 faiz bəndi (son 28 ildə ən kəskin artım) artırılaraq 1,5-1,75 %-ə, iyulda 0,75 faiz bəndi artırılaraq 2,25-2,5 %-ə, sentyabrda 0,75 faiz bəndi artırılaraq 3-3,25 %-ə və noyabrda daha 0,75 % artırılaraq 3,75-4 %-ə çatdırıldı.