Hazırda Avropa yüksək patogenli quş qripinin ən yüksək həddə çatan epidemiyasını yaşamaqdadır.

Valyuta.az Səhiyyə Nazirliyinə istinadla xəbər verir ki, dünyanın 37 ölkəsində 3573 çöl quşunun, o cümlədən təsərrüfatlarda 2467 quşun, 187 ev heyvanının yoluxduğu dəqiqləşdirilir. İndiyədək insanlar arasında yoluxma halı qeydə alınmayıb. Amma ekspertlər qış mövsümünə qədər vəziyyətin pisləşəcəyini proqnozlaşdırır.

Azərbaycanda epidemioloji vəziyyətə gəlincə, Səhiyyə Nazirliyinin məlumatına görə, hazırda insanlar arasında quş qripinə yoluxma halına rast gəlinməyib və epidemioloji vəziyyət nəzarət altındadır.

Bəs, bu xəstəliklə əlaqədar ölkəyə idxal edilən quş əti məhsulları ilə bağlı hansı tədbirlər görülür?

Respublika Qida Təhlükəsizliyi Agentliyinin açıqlamasına görə, başqa ölkələrdən respublikamızın ərazisinə keçə biləcək yoluxucu heyvan xəstəliklərindən qorunmaq məqsədilə Ümumdünya Heyvan Sağlamlığı Təşkilatından (WOAH) daxil olan məlumatlar əsasında dünyadakı epizootik vəziyyətə uyğun olaraq müvafiq tədbirlər həyata keçirilir.

“Xəstəlik qeydə alınan ərazilərdən WOAH-nin müvafiq qərarlarına əsasən, zonalaşma prinsipi ilə diri quş, quş əti, quşçuluq məhsulları və avadanlıqlarının idxalına və ölkə ərazisindən tranzit daşınmasına müvəqqəti məhdudiyyət qoyulub. Nəzarət tədbirlərinin gücləndirilməsi məqsədilə Dövlət Gömrük Komitəsinə də müraciət olunub. İdxala xarici ölkələrin yalnız epizootik sağlamlıq statusu olan ərazilərdən icazə verilir.