“E-manat” ödəniş terminallarından Azərbaycan Beynəlxalq Bankına (ABB) məxsus “iCard” mobil tətbiqinə pul köçürmələri zamanı məbləğin hesaba daxil edilmədiyi bildirilir.

Bu barədə Yeniavaz.com-a “iCard” istifadəçiləri məlumat verib.
İstifadəçilər qeyd edirlər ki, “iCard” balansını artırmaq üçün “e-manat” ödəniş terminallarından istifadə edirlər, akin terminala daxil edilən məbləğ kartın hesabına köçmür.

Bank istifadəçiləri bildirirlər ki, ABB problemin onlardan qaynaqlandığını qəbul edir. Lakin məsələnin ən qısa zamanda öz həllini tapacağını desələr də, nəticə yoxdur. Belə ki, bank istifadəçiləri bildirirlər ki, 2 həftə keçməsinə baxmayaraq hələ də problem aradan qaldırılmayıb.
Məsələ ilə bağlı “e-manat”dan Yeniavaz.com-a bildirildi ki, problem qarşı tərəfdən qaynaqlanır:

“Pulun hesaba oturması “e-manat” yox, bank tərəfindən tənzimlənən bir məsələdir. Bu bankın sistemindən asılı olan bir prosesdir. Terminalda ödəniş uğurludur, amma məbləğ müştərinin hesabında yoxdursa, bu qarşı tərəfdən, ikinci şirkətdən qaynaqlanan nasazlıqdır”.

ABB-dən isə Yeniavaz.com-a bildirdilər ki, hazırda məsələ ilə bağlı təkmilləşdirmə işləri aparılır. Bankdan digər suallarımıza ancaq yazılı sorğu əsasında cavab veriləcəyi bildirildi.