Getdikcə daha çox ölkə koronavirus infeksiyasını endemik xəstəlik kimi tanımaq niyyətini bəyan edir, əsas məhdudiyyətləri, hətta maska rejimini və COVİD pasportlarını ləğv edirlər. Yoluxmanın yüksək səviyyədə olmasına baxmayaraq, bəzi ölkələr “Omikron” ştamının əvvəlkilərə nisbətən ağırlaşma verməməsi  və kollektiv immunitetin yüksək səviyyədə olması, o cümlədən peyvənd yolu ilə pandemiyadan əvvəlki həyata tədricən qayıtmağa imkan verdiyini söyləyirlər. 

Ümumdünya Səhiyyə Təşkilatı (ÜST) isə hesab edir ki, hər bir ölkə öz epidemioloji vəziyyətini nəzərə alaraq, koronavirusla mübarizə tədbirlərini müəyyən etməlidir. Eyni zamanda dünya ictimaiyyəti peyvənd və qoruyucu vasitələr tədarük etməli olan dövlətlərlə həmrəylik nümayiş etdirərsə, pandemiyanın kəskin mərhələsindən çıxış yolu hələ 2022-ci ildə tapıla bilər. Təşkilatın yaxın qlobal məqsədi 2022-ci ilin ortalarına qədər hər bir ölkədə əhalinin peyvəndlənməsinin 70%-ə çatmasıdır.

ÜST-in Avropa Regional Direktoru Hans Klugenin sözlərinə görə, Avropa indi yüksək peyvəndləmə nisbətləri və yazın gəlişi ilə əlaqədar “mövsümi fasiləyə” və “infeksiyanın daha az öldürücü olması” sayəsində infeksiyanın yayılmasını nəzarət altına almaq üçün unikal imkana malikdir.

Bununla belə, artıq bir çox ölkələr sərt karantin rejimindən yavaş-yavaş qurtulurlar. Avropada ilk olaraq Böyük Britaniya 2021-ci ilin yayında əsas məhdudiyyətləri qaldırmağa başladı. Baş nazir Boris Consonun sözlərinə görə, krallığın 12 yaşdan yuxarı sakinlərinin 60%-dən çoxunun qəbul etdiyi gücləndirici peyvənd kampaniyası olmadan normal həyata qayıtmaq mümkün olmayacaq. Martın sonuna qədər səlahiyyətlilər, koronavirus üçün müsbət test edənlər üçün məcburi özünütəcrid tələbini aradan qaldırmaq niyyətindədirlər.

Fevralın 1-də son məhdudiyyətlərin qaldırıldığı ilk Avropa ölkəsi Danimarka olub - COVİD artıq orada sosial təhlükəli xəstəlik hesab edilmir. Bununla belə, baş nazir Mette Frederiksen danimarkalıların payız və qış aylarında yenidən buster doza peyvənd olunacağını istisna etməyib.

Fevralın 9-dan İsveç də demək olar ki, bütün məhdudlaşdırıcı tədbirləri, fevralın 12-dən isə Norveç ləğv edib. Bu ölkələrin səlahiyyətlilərinə görə, infeksiyanın ən ağır nəticələri arxada qalıb. Fransada fevralın 28-dən etibarən COVİD sertifikatlarının yoxlanıldığı otaqlarda məcburi maska taxılmasını ləğv etmək niyyətindədirlər. Eyni zamanda maskalar daha küçədə, ictimai yerlərdə taxıla bilməz və Parisdə yalnız sosial məsafəni qorumaq mümkün olmayanda onlara taxmaq tövsiyə olunur.

Finlandiyada məhdudiyyətlərin götürülməsinin əsas mərhələsi də fevralın 14-dən başlanıb - restoranların fəaliyyətinə və müxtəlif tədbirlərdə iştirak edənlərin sayında məhdudiyyətlər yumşaldılıb. Fevralın 28-dək ölkədə COVİD pasportlarının istifadəsi dayandırılacaq. Bəzi ölkələr digər tədbirləri yumşaldır - məsələn, İsveçrədə fevralın 3-dən məsafədən iş rejimi və xəstə ilə təmasda olanlar üçün karantin ləğv edilib. Eyni vəziyyət Rusiyada da tətbiq edilib.

ABŞ-da isə getdikcə daha çox ştat COVİD-lə mübarizə üçün əsas tədbirlərdən biri olan maska rejimindən imtina edir. Daha beş - Nyu Cersi, Konnektikut, Oreqon, Delaver və Kaliforniya - bu həftə maska taxma tələblərini yüngülləşdirdiklərini açıqlayıblar. Bununla belə, ABŞ Federal Xəstəliklərə Nəzarət və Qarşısının Alınması mərkəzlərinin rəhbəri Rochelle Walensky hesab edir ki, insident və xəstəxanaya yerləşdirilmə nisbətləri bu tədbirdən imtina etmək üçün hələ də çox yüksəkdir.

Eyni zamanda 2021-ci ildə antikoronavirus məhdudiyyətlərinin geri qaldırılmağa başladığı Latın Amerikasında maskalar hələ də ləğv edilməyib. Belə ki, Kubada peyvəndin yüksək tempinə görə ölkə rəhbərliyi artıq sentyabr ayında kafe və restoranlara müəssisələrdə müştəriləri qəbul etməyə icazə verib və çimərliklərə giriş də açılıb. Lakin ictimai yerlərdə maskalar və sosial məsafə hələ də məcburidir.

Göründüyü kimi, Avropa ölkələri  əvvəlki həyata qayıtmaqla bağlı cəsarətli addım atıblar. Tezliklə qitənin əksər hissəsində karantin rejimi ilə vidalaşacaqlar. Bununla belə, peyvənd təbliğatı da dayanmayıb. Bəs görəsən, Azərbaycanda nə zaman sərt karantin rejimi ləğv olunacaq, əhali əvvəlki həyatına qayıdacaq?

Mövzu ilə bağlı “Yeni Müsavat”a infeksionist-hepatoloq Mərdan Əliyev bunları şərh edib: “Böyük ehtimalla yaxın zamanda karantin qaydaları aradan qaldırılacaq. ”Omikron" la bağlı vəziyyət onu göstərir ki, yoluxma sayı çox olsa da, xəstəxana şəraiti tələb olunan xəstələrin sayı çox olmur, ölüm göstəriciləri də azdır. Yəni səhiyyə sistemi yüklənmir. Buna görə artıq məhdudiyyətləri götürmək olar. Həm də üzü yaya doğru gedirik, fəsil də yoluxmanın əleyhinədir. Yoluxma sayı yaz-yay aylarında daha çox olur. Qış aylarında yoluxma daha çox olur. Əksər hallarda “Omikron”a yoluxmuş şəxslər ev şəraitində müalicə alırlar. Bütün bunları nəzərə alaraq karantin qaydaları aradan qaldırılacaq".

Yeri gəlmişkən, ölkəmizdə koronavirusa yoluxma sayı aşağı düşüb. Ötən gün COVID-19-a 1 038 yeni yoluxma faktı qeydə alınıb, 3 324 nəfər müalicə olunaraq sağalıb. Nazirlər Kabineti yanında Operativ Qərargahdan Musavat.com-a verilən məlumata görə, analiz nümunələri müsbət çıxan 26 nəfər vəfat edib. İndiyədək ölkədə ümumilikdə 775 432 nəfərin koronavirus infeksiyasına yoluxması faktı müəyyən edilib, onlardan 737 710 nəfər müalicə olunaraq sağalıb, 9 261 nəfər vəfat edib. 28 461 nəfər aktiv xəstə sayını təşkil edib. Son sutka ərzində yeni yoluxma hallarının müəyyənləşdirilməsi ilə əlaqədar 5 683, bu günə qədər isə ümumilikdə 6 491 040 test icra olunub.