Bu ildən topdansatış mərkəzlərində və bazarlarda vergi postları qurula bilər.

Bununla bağlı Vergi Məcəlləsinə yeni müddəa əlavə olunub. Belə ki, Məcəlləyə əlavə olunan 23.1.3-1-ci maddəyə əsasən, malların, o cümlədən kənd təsərrüfatı məhsullarının topdan satışı ilə məşğul olan ticarət obyektlərində, bazarlarda nəzarət postlarının qurulmasını və bu obyektlərə bu Məcəllə ilə müəyyən edilmiş qaydada sənədləşdirilməyən, habelə əmtəə-nəqliyyat qaiməsi olmayan malların gətirilməsinin qarşısının alınması səlahiyyətlərini həyata keçirmək vergi orqanlarının hüquqlarına aid edilib.

Bəs bu postlar harada qurulacaq və onların işi nədən ibarətdir? Suallarımıza iqtisadçı Anar Bayramov aydınlıq gətirib. Onun sözlərinə görə, vergi orqanının iri həcmli marketlərin, supermarketlərin qarşısında postlar qurması qanunvericilikdə qeyd edilməyib:

“Yəni, vergi orqanı geniş şəbəkəyə malik olan “X” supermarket anbarının qarşısında post quraraq, şirkətlərdən daxil olan mallar üzrə sənədlərin yoxlamasını həyata keçirməyəcək. Vergi Məcəlləsinin 23.1.3-1-ci maddəsində qeyd edilən postların aşağıdakı obyektlərdə qurulması planlaşdırılır:
- malların topdansatışı ilə məşğul olan ticarət obyektlərində;
- kənd təsərrüfatı məhsullarının topdan satışı ilə məşğul olan ticarət obyektlərində;
- bazarlarda”.

A.Bayramov vurğulayıb ki, vergi orqanı tikinti materiallarının satışı həyata keçirilən “Dərnəgül” taxta bazarının qarşısına post qoymaqla Məcəllə ilə müəyyən edilmiş qaydada sənədləşdirilməyən, habelə əmtəə-nəqliyyat qaiməsi olmayan malların gətirilməsinin qarşısının ala bilər. Eyni qayda ilə kənd təsərüfatı məhsullarının satışını həyata keçirən yarmarka və ya bazarların qarşısında post qurmaqla həmin şəxslərdən də malların sənədlərini tələb etmək hüququna malikdir.

Beləliklə, yeni qayda yalnız topdansatışla məşğul olan ticarət obyektlərinə şamil ediləcək.//İndex.az