"TuranBank" ilə ECO Ticarət və İnkişaf Bankı arasında beynəlxalq ticarət əməliyyatlarının maliyyələşdirilməsini genişləndirmək məqsədilə 2 milyon ABŞ dolları həcmində yeni kredit sazişi imzalanıb. 

Valyuta.Az-ın banka istinadla verdiyi xəbərə görə, cəlb olunan vəsaitlər TuranBank-a istər üzv, istərsə də digər ölkələr arasında idxal-ixrac əməliyyatlarının genişləndirilməsinə, müştərilərin ticarət əməliyyatlarının dəstəklənməsinə imkan yaradacaq.

Məlumat üçün qeyd edək ki, bu, "TuranBank"ın ECO Ticarət və İnkişaf Bankı ilə imzalanmış sayca dördüncü sazişidir. Belə ki, Bankz əvvəlki illərdə də bu maliyyə qurumundan Kiçik və Orta Sahibkarlığın (KOS) və ticarətin maliyyələşdirilməsi üçün maliyyə vəsaiti cəlb etmişdi.

ECO Ticarət və İnkişaf Bankının üzv dövlətləri Azərbaycan, Türkiyə, İran, Pakistan, Əfqanıstan və Qırğızıstandır. Bank region ölkələrində müxtəlif sahələrin maliyyə ehtiyaclarını qarşılamaqla istər dövlət, istərsə də özəl sektorda davamlı iqtisadi inkişafı və regional inteqrasiyanı dəstəkləyir.