Fransanın avtomobil ehtiyatı hissələri istehsalçısı "Faurecia" şirkəti, Almaniyanın avtomobil işıqlandırma qrupu "Hella"nın əksəriyyət hissəsini almaq üçün razılaşıb.

Valyuta.az Marja.az-a istinadən xəbər verir ki, "Faurecia" ailə şirkəti "Hella"nın 60% hissəsini alır. Həmçinin şirkət qalan 40%-lik hissə üçün səhmbaşına 60 avroluq (70,75 dollar) bir təklif təqdim edib.  

"Faurecia"nın yaydığı məlumata görə, "Hella"nın 100%-i üçün edilən təklif şirkətin cəmi dəyərini təxminən 6,7 milyard avroya (7,9 milyard dollar) yüksəldir. 

Almaniyadakı satınalma və birləşmə qaydalarına görə, bir şirkətin 60%-nin alınması, qalan hissələr üçün də alış təklifi edilməsinin önünü açır. 

"Faurecia"nın Baş direktoru Patrick Koller, "birləşmə ilə şirkətin sektordakı inkişaflara reaksiya verə biləcək ən ideal mövqeyə gələcəyini" vurğulayıb.

Yeni şirkət elektrikli, hidrogen yanacaqlı vasitələrə, sürücü assistentlərinə və avtonom vasitələrə fokuslanacaq.

6,7 milyard avroluq satınalmadan sonra yeni yaranacaq şirkət dünyanın ən böyük yeddinci avtomobil yan sənayesi şirkəti olacaq. Yeni şirkətin satışlarının 2025-ci ildə 33 milyard avroya çatması hədəflənir.