Bürc Xəlifə kimi planetin ən hündür binası və bir sıra başqa rekordlarla məşhur olan Dubay daha bir yeniliyə imza atıb.

Valyuta.az Marja.az-a istinadən xəbər verir ki, dünəndən etibarən “Yaxın Şərqin incisi”ndə dünyanın ən dərin hovuzunun açılışı olub.

Dərinliyi 60 metrə çatan hovuz öz göstəriciləri ilə ötən ilin dekabrında istifadəyə verilmiş Polşanın Deepspot üzgüçülük mərkəzini (45) metr geridə qoyaraq, dünya rekordunu yeniləyib. Hovuzu doldurmaq üçün 14 milyon litr su lazımdır, bu isə Olimpiya oyunlarındakı 6 üzgüçülük hovuzunun həcmi qədərdir. Suyun temperaturu 30 °C-də saxlanılır ki, dərinliyə baş vurmaq istəyənlər üçün yüngül üzgüçülük kostyumu geyinmək rahat olsun.

Hovuzun daha bir maraqlı özəlliyi 1500 kvadrat metrlik “batmış şəhər”in daxilində yerləşməsidir. Deep Dive Dubai adlanan, balıqqulağına bənzər nəhəng attraksionun içərisində ən müasir işıqlandırma və səs sistemləri quraşdırılıb, qədim sualtı xarabalıq effektləri yaradılıb. Regionun ən iri sualtı kino studiyası da burda yerləşir.

Hələlik yalnız xüsusi dəvət əsasında xidmət göstərən obyektin ilk ziyarətçisi Dubay şahzadəsi Şeyx Həmdan bir Məhəmməd bin Rəşid əl Məktum olub. Nəhəng attraksion hovuzla birlikdə ilin sonunda dayvinq həvəskarlarının istifadəsinə veriləcək.  

Qiymətlər 800 dirhəmdən (218 dollardan) başlayır.