2021-ci ilin yanvar-may aylarında “Azərkosmos” ASC tərəfindən dünyanın 29 ölkəsinə 19,4 milyon ABŞ dolları dəyərində xidmət (peyk telekommunikasiya xidmətləri və optik peyk xidmətləri) ixrac edilib.

Valyuta.az xəbər verir ki, bu barədə İqtisadi İslahatların Təhlili və Kommunikasiya Mərkəzinin təqdim etdi “İxrac icmalı”nın iyun sayında qeyd olunub.

Məlumatda, peyk operatorunun əldə etdiyi gəlirin ötən ilin müvafiq dövrü ilə müqayisədə 2% artdığı qeyd edilib.

“Azərkosmos” ASC-nin xidmət ixracından əldə etdiyi gəlir onun ümumi gəlirlərinin 90 faizini təşkil edib. 2021-ci ilin may ayında isə “Azərkosmos” ASC dünyanın 26 ölkəsinə 2,5 mln. dollar dəyərində xidmət ixrac edib ki, bu da aprel ayı ilə müqayisədə 60,3% azdır.

2021-ci ilin yanvar-may ayları ərzində daxil olan ixrac sifarişlərinin ilk beşliyində isə ABŞ (5,1 mln. dollar), Birləşmiş Krallıq (4,1 mln. dollar), Fransa (3,8 mln. dollar), Malayziya (3,6 mln. dollar) və BƏƏ (727 min dollar) qərarlaşıb.