Azərbaycan Prezidentinin 2016-cı il 11 aprel tarixli 860 nömrəli fərmanı ilə təsdiq edilmiş “Azərbaycan Respublikasının Dövlət İmtahan Mərkəzi publik hüquqi şəxsin Nizamnaməsi”nə uyğun olaraq, mərkəz 2020-ci il ərzində dövlət qulluğuna qəbul üzrə 7 müsabiqə, 7 ümumi müsahibə elanı verilmiş və 60 daxili müsahibə üzrə müsahibələrin keçirilməsini təmin edib.

Valyuta.az xəbər verir ki, bu sözlər DİM Direktorlar Şurasının sədri Məleykə Abbaszadənin 2021-ci il 23 iyun tarixində Xalq qəzetində dərc olunmuş məqaləsində qeyd edilib. 

Məqalədə göstərilib ki, vakant vəzifələr üzrə vəzifə təlimatları və müsahibə proqramları “Dövlət qulluğu-Vəzifələrin İdarəedilməsi Sisteminə” (VİS) daxil edilmiş və bütün elanlar bu sistem vasitəsilə verilib: 

DİM sədri, müsahibə elanları haqqında məlumatın mərkəzin internet portalı ilə yanaşı, dövlət orqanlarının da internet səhifələrində də yerləşdirildiyini qeyd edib: 

“Qeyd olunanlarla yanaşı, hesabat dövrü ərzində dövlət qulluğuna namizədlərin qiymətləndirilməsi üzrə test imtahanları müvafiq qanunvericiliyə uyğun şəkildə keçirilib. Mərkəzin test bankı yenidən ekspertiza edilib, yeni test tapşırıqları hazırlanıb. O cümlədən səriştə modelinə keçid məqsədilə banka situasiya tipli (kazus) tapşırıqlar hazırlanaraq daxil edilib və keçirilən test imtahanlarında istifadə olunub.

Namizədlərin dövlət qulluğuna qəbul üçün müsabiqənin test imtahanı mərhələsinə daha yaxşı hazırlaşmaları, mövcud test nümunələri ilə tanış olmaları məqsədilə keçən il ərzində 8 sınaq imtahanı keçirilib. Sınaq imtahanlarında ümumilikdə 159 müraciət qeydə alınıb, onlardan 146-sı (91,8%) imtahanda iştirak edib”.