“Biz ötən il yeni, 3 illik strateji plan hazırladıq və ona əsasən korporativ sektora üstünlük verdik”.

Valyuta.az xəbər verir ki, bunu jurnalistlərə açıqlamasında “Bakı Fond Birjası” QSC-nin İdarə Heyətinin sədr vəzifəsini müvəqqəti icra edən Eldar Abdullayev deyib.

Birjada korporativ sektorun aktivliyinin daha çox onun özündən asılı olduğunu söyləyən E.Abdullayev, araşdırma apardıqlarını qeyd edib: 

“Biz gördük ki, özəl şirkətlərdə maliyyə menecmenti zəifdir. Onlar özləri oturub hesablamalıdırlar ki, bankdan kredit almaq yoxsa istiqraz buraxmaqla vəsait cəlb etmək sərfəlidir? Sizə nümunə olaraq “AzerGold” QSC-ni göstərə bilərəm. Onlar xarici valyutada istiqraz buraxmışdılar. Həmin qiymətli kağızlara 1-ci dəfə o qədər yüksək tələb oldu ki, şirkət 2-ci dəfə çox aşağı faizlə vəsait cəlb etdi. Çünki onların maliyyə menecmenti güclüdür”.

Onun sözlərinə görə, Azərbaycanda banklardan vəsait cəlb etmək çətin deyil: 

“Amma mən inanmıram ki, banklar balans hesabatını göstərməyən və yaxud zərərlə işləyən şirkətə vəsait ayırsln. Çünki banklarda risk menecmenti yüksək səviyyədə işləyir”.