Elektromobil bazarının lideri Teslanın bir sıra modellərinin qiyməti artmaqdadır.

Valyuta.az Marja.az-a istinadən xəbər verir ki, dünən şirkətin rəhbəri Elon Mask Tvitter sosial şəbəkəsində bir istifadəçinin bununla bağlı paylaşımını cavablandırıb.

“Mən həqiqətən də Teslanın qiymətləri qaldırmasını, Y modellərində lumbar (sürücü və sərnişinin onurğa-dayaq sisteminə əlavə ağırlıq salmadan oturacaqda düz şəkildə əyləşməsinə imkan verən funksiya) kimi xüsusiyyətlərin ləğv edilməsi yolu tutduğunu bəyənmirəm” yazan istifadəçiyə Tesla rəhbəri belə cavab verib: “Qiymətlər təchizat zəncirindəki problemlər və təzyiqlər, xüsusən xammalla bağlı çətinliklərə görə artır... Lumbar isə 3/Y modellərində yalnız ön oturacaqlarda çıxarılıb, çünki bundan demək olar ki, heç kəs istifadə etmir.”

Tesla may ayında Model 3 və Model Y avtomobillərinin qiymətini qaldırıb. Elektromobil sənayesinə əsas bələd olan mənbələrin, o cümlədən Electrek saytının məlumatına görə, bu, artıq son bir neçə aydakı 5-ci ardıcıl qiymət artımıdır. Electrek dünən yeni Model Y SUV-larını alan şəxslərin bu elektromobilin lumbar funksiyası olmadan satıldığını bildirdiklərini yazmışdı.