Xəbər verdiyimiz kimi artıq bu gündən etibarən açıq havada maska taxmaq zərurəti ləğv edilib. 
 
Nazirlər Kabineti yanında Operativ Qəraragahın qaydalarına əsasən yalnız qapalı məkanda maska istifadəsi məcburidir. 

Bəs, qapalı məkanlarda bu qərarın ləğvi nə vaxt mümkün olacaq?

Valyuta.az Sfera.az-a istinadən xəbər verir ki, məsələ ilə bağlı danışan Azərbaycan Tibb Universitetinin müəllimi, cərrah Rauf Qasımov açıq havada da maska taxmağın zəruri olduğunu bildirib:
 
"Açıq havada ara məsafəsini mütləq gözləmək lazımdır. Əgər ara məsafəsi qorunmursa, açıq hava da olsa mütləq şəkildə vətəndaş maskadan istifadə etməlidir. Yəni ola bilər ki, kimsə yolda yaxınlaşıb sizdən nəsə soruşur, yaxud sıxlıq içərisindəsinizsə, maskasız gəzmək təhlükə yarada bilər. Bundan əlavə isə həmişə dediyimiz kimi gigiyenik qaydalara riayət etmək mühümdür". 

R.Qasımov bir müddət sonra qapalı məkanlarda da maska taxmaq zərurətinin ləğv edilə biləcəyini qeyd edib:

"Bir müddət sonra, peyvəndlənmə bitdikdə hamıda immunitet yarandıqda qapalı məkanlarda da maska taxmağa ehtiyac qalmayacaq. Amma gərək hamıda aktiv, ya da passiv immunitet formalaşsın. Qarşıdakı müddətdə qapalı məkanlarda maska istifadəsi ilə bağlı da qərar veriləcəyini düşünürəm". 

Qeyd edək ki, Azərbaycanda yeni koronavirus (COVID-19) infeksiyasına qarşı 44 min 735 doza vaksin vurulub. Onlardan birinci mərhələ üzrə vaksinasiya olunanların sayı 34 min 8, ikinci mərhələ üzrə peyvənd edilənlərin sayı isə 4881 nəfərdir.