Ötən gün Milli Televiziya və Radio Şurasının (MTRŞ) iclasında Lider TV də daxil olmaqla, bir sıra kanalların lisenziyalarının qüvvəsinə xitam verildi və xüsusilə Lider televiziya kanalının bağlanması müzakirə obyekti oldu. Hazırda kimi həmin kanalları əvəzləyəcək televiziyalara ehtiyacın olduğunu, kimi isə ümumiyyətlə, bunun əksini düşünür.

Maraqlıdır, Azərbaycan televiziya kanalları ilə bağlı daha hansı addımlar atıla bilər? Bağlanan kanalları əvəzləyən olacaqmı?

Valyuta.az Sfera.az-a istinadən xəbər verir ki, teletənqidçi, Əməkdar jurnalist Qulu Məhərrəmli bununla bağlı açıqlama verib. 

Q.Məhərrəmli bildirib ki, MTRŞ-nın televiziya məkanında gedən proseslərə biganə olmaması,  tendensiyalar üzə çıxarması, prosesləri təhlil etməsi, müəyyən nəticələr ortaya qoyması yaxşı haldır:

"Yayımı dayandırılan Lider kanalı ilə bağlı məsələ yeni deyil. Çünki həmin kanalın proqram siyasətində müəyyən problemlərin mövcudluğu, iqtisadi cəhətdən müflis olduğu, işçilərinin uzun müddətdir maaş almadığı və.s göz qabağında idi. Şəxsən hansısa media qurumunun fəaliyyətini dayandırmasını istəməzdim, lakin reallıqlarla barışmaq lazımdır. Bağlanan kanalları hansısa media qurumu əvəz edəcək, ya etməyəcək, məncə bunun üzərində çox ciddi düşünməyə ehtiyac var. Azərbaycanda özəl televiziyaların hansı bir-birindən fərqlənir? Çox cüzi şəkildə bəzi kanlların xəbər proqramları fərqlənə bilər. Amma yerdə qalanların demək olar ki, eyni yayım siyasəti var, konsepsiyalar, yanaşmalar xeyli oxşardır. Ona görə də yeni kanal olacaqsa, bu, tamamilə fərqli olmalıdır”.

Q.Məhərrəmli qeyd edib ki, Azərbaycanda xüsusi olaraq maarifçilik kanalının olmasına ehtiyac var:

"Mədəniyyət, idman kanallarının olduğu bəllidir. Yaxud düzdür, ARB Günəş olsa da, bununla yanaşı, uşaqlar üçün ayrıca dövlətin himayəsində olan kanalın, eləcə də, Yaponiya və ya digər inkişaf etmiş ölkələrdə olduğu kimi ayrıca təhsil kanalının olması yaxşı olardı. Çünki cəmiyyətimizin ən çox buna ehtiyacı var”.

Tanınmış media eksperti Zeynal Məmmədli isə saytımıza açıqlamasında bildirdi ki, söhbət sərbəst bazardan gedirsə, televiziya kanallarının fəaliyyəti tamaşaçı marağı ilə bağlıdır:

"Tamaşaçıların bu kanallara baxması, onların reytinqinin olub-olmaması və televiziyaların öz fəaliyyəti üçün media reklam bazarından maliyyə qazana bilməsi və.s önəmli məsələlərdir. Amma bizdə problemlərə diaqnoz qoymaq çətindir, çünki media reklam bazarı şəffaf deyil, məlumatlar açıqlanmır, televiziyaların nə qədər gəlir götürdüyünü bilmək olmur. Biz heç dövlətdən maliyyələşən televiziyaların reklam gəlirləri ilə bağlı rəqəmləri öyrənə bilmirik, o ki qaldı, özəl kanallara. Ona görə də, söhbət kanalların öz maliyyə ehtiyaclarını təmin etmə bacarığından gedir. Görünür, özəl televiziyaların hamısı konkret sponsorlardan, kimlərdənsə asılı olur və onların müstəqilliyi ilə bağlı birmənalı fikir söyləmək də çətindir. Bu baxımdan televiziyaların sıradan çıxmasına təbii baxmaq lazımdır. Əgər öz maliyyə ehtiyaclarını təmin edə bilmirlərsə, bunu anlamaq olar”.

Ekspert vurğulayıb ki, hansısa televiziyaya ehtiyac olub olmadığı ilə bağlı sosial sorğular aparılmalıdır:

"Çox təəssüf ki, bu da edilmir. Azərbaycan elə də çox tamaşaçısı olan ölkə deyil. Potensial əhalisi 10 milyondur, amma onun nə qədər hissəsinin xarici, nə qədərinin yerli televiziyalara baxdığını bilmirik. Sərbəst reklam bazarı olarsa, güclülər, ehtiyac olanlar qalacaq. Bu mənzərə də aydın olmadığından, konkret söz demək çətindir”.