“Dövlət rüsumu lisenziya, icazə, sertifikat verilməsində, qeydiyyata alma, sənəd verilməsi və notariat hərəkətlərinin aparılması kimi hallarda tələb olunur”. 

Valyuta.az xəbər verir ki, bu sözləri hüquqşünas Şəhriyar Həbilov bildirib. 

Ödənilmiş rüsum məbləğlərinin qaytarılması və dövlət rüsumu ödəməkdən azadolma və ilə bağlı suallara aydınlıq gətirən hüquqşünas bildirib ki, "Dövlət rüsumu haqqında" Qanuna əsasən, dövlət rüsumu dövlət orqanlarının göstərdiyi xidmətlərə və hüquqi hərəkətlərə görə ödənilən vəsaitdir.

Dövlət rüsumunun milli valyutada ödənildiyini və ödəmədən sonra ödənişi təsdiq edən sənədin təqdim edildiyini deyən Şəhriyar Əbilovun sözlərinə görə, aşağıdakı hallarda ödənilmiş dövlət rüsumu geri qaytarıla bilər:

“Artıq ödənilmə hissəsində rüsumun qaytarılması, ərizə baxılmamış saxlandıqda, qaytarıldıqda (bu hallara məhkəmə işlərində daha çox rast gəlinir), notariat hərəkətləri icrasından imtina edildikdə və məhkəmələr tərəfindən iş üzrə icraata xitam verildikdə rüsum geri qaytarılır. Düzgün tutulmayan və ya artıq ödənilən rüsum barədə 5 il ərzində rüsumu tutan quruma iddia vermək mümkündür. Rüsum 45 gün müddətində verilir”.

Ş.Həbilov, qanuna görə, aşağıda göstərilən şəxslərin rüsum ödəməkdən azad olduğunu diqqətə çatdırıb:

“İlk öndə əməyin ödənilməsi və əmək fəaliyyəti ilə bağlı iddiaçılar gəlir. Daha dəqiq desək, işçinin əməyi düzgün ödənilmirsə, yaxud işçi işəgötürənə qarşı əmək fəaliyyətindəki qanun pozuntusu ilə bağlı məhkəmədə iddia qaldırırsa, rüsum ödəməkdən azaddır. Boşanma işləri, yaxud boşanmadan da ər-arvada qarşı aliment iddiası qaldırıldıqda bu iddialara görə rüsum tutulmur. Şikəstlik, səhhətə vurulan zərər, ailəni dolandıranın ölümü ilə bağlı dəyən zərər üzrə iddia qaldırıldıqda da rüsum ödənilmir. Müəlliflik hüququ ilə bağlı mübahisələrdə iddiaçı rüsum ödəməkdən azaddır. İstehlakçı hüququ pozulduqda məhkəməyə müraciət edən istehlakçı rüsum ödəməkdən azaddır. Cinayət, aliment işləri ilə əlaqədar sənədlər verilməsinə görə rüsum tutulmur”. 

Ekspert, inzibati hüquq münasibətlərindən yaranan işlərdə (bir tərəfdə dövlət qurumu çıxış edən) də rüsumun tutulmadığını vurğulayıb:

“Eləcə də öz hüquqlarının müdafiəsi ilə əlaqədar yetkinlik yaşına - 18 yaşa çatmayanlar rüsum ödəməkdən azaddır. Məhkəmə qərarlarından şikayətlər, qiyabi icraat üzrə qərarlara yenidən baxılması üzrə verilən ərizələr zamanı da rüsum ödənilmir. Həmçinin, məhkəmədə verilən iddialarla bağlı şəhid ailələri, müharibə veteranları, qaçqınlar və məcburi köçkünlər, habele Çernobıl AES-də qəza nəticəsində şüa xəstəliyinə və şüa yükü ilə əlaqədar xəstəliyə tutulmuş və ya bu xəstəlikləri keçirmiş şəxslər rüsum ödəməkdən azad olunublar. Məhkəmə aktlarını verməyə görə də rüsum tələb edilmir”.

Ş.Həbilov sonda vurğulayıb ki, dövlət rüsumlarının həcmi və tutulan hallar barədə “Dövlət rüsumu haqqında” Qanunda ətraflı məlumat verilib.