“Dövlət COVİD-19 pandemiyası ilə əlaqədar olaraq bir sıra sosial dəstək tədbirləri həyata keçirdi. Dövlət sektorunda 900 minədək işçidən karantin dövründə təxminən 80%-i işə çıxmasa da, əməkhaqqı ödənildi”. 

Valyuta.az xəbər verir ki, bunu Dövlət Məşğulluq Agentliyinin sədri Mustafa Abbasbəyli APA-ya müsahibəsində söyləyib.

Özəl sektor üzrə 760 min nəfərin işsizlik riskinin qarşısın alındığını deyən DMX sədri bildirib ki, bu sektorda pandemiyadan zərər çəkmiş sahələrdə işləyən 600 min nəfərə dövlət dəstəyi göstərilib:

“Görülən tədbirlər nəinki əmək müqavilələrinin sayının azalmasına imkan verməyib, hətta, müqavilələrin sayında ciddi artım özünü göstərib. 2020-ci ilin əvvəli ilə müqayisədə müqavilələrin sayında 24% (və ya 154 min) artım qeydə alınıb. Əmək haqqı fondunda 12% artım olub, o cümlədən özəl sektorda 19% , dövlət sektorunda 5% artım qeydə alınıb. Ümumən son 3 ildə əmək müqavilələrinin sayı 30% və ya 400 min (300 min özəl, 100 min dövlət) artıb”. 

Onun sözlərinə görə, işsiz və xüsusi karantin rejimi dövründə gəlirini itirmiş qeyri-formal məşğul şəxslərdən ibarət aztəminatlı 600 min şəxsin yaşayış minimumu (190 manat) həcmində birdəfəlik ödəmə ilə təminatı proqramı icra olunu:

“Belə ki, 2020-ci ilin aprel-may aylarında bütün ölkə üzrə 600 min şəxs, sonralar sərtləşdirilmiş karantin rejimi tətbiq olunan bölgələr üzrə 3 dəfə ödəmə, dekabr ayında yenidən bütün ölkə üzrə ödəmə aparılıb. Bu istiqamətdə ümumilikdə 450 mln. manat vəsait xərclənib. İctimai işlər proqramı genişləndirilib, ödənişli ictimai iş yerlərinin sayı 38 mindən 90 minə çatdırılıb”. 

M.Abbasbəyli vurğulayıb ki, işsiz şəxslərə işsizlikdən sığorta ödənişinin, peşə hazırlığı prosesində fasilə yaranmış kursların müdavimlərinə təqaüdün verilməsi müddətləri də uzadılıb:

“Dünya İqtisadi Forumunun (WEF) 2020-ci il üçün hesabatında işəgötürənlər üçün 2025-ci ilədək məntiqi təfəkkür və yeniliyə açıqlıq, tədqiqatçılıq, texnologiyadan istifadə, monitorinq və nəzarət, Texnoloji dizayn və proqramlaşdırma kimi bacarıqların əsas olacağı proqnoz edilir. Beləliklə, pandemiyanın uzunmüddətli təsirləri avtomatlaşdırma prosesinin sürətləndirilməsini şərtləndirir. COVID-19 xüsusilə fiziki yaxınlığı yüksək olan iş sahələrində avtomatlaşdırma və süni zəkanın daha sürətli qəbul olunması və tətbiqinə təkan verdi”. 

Pandemiyanın bir çox sahələrdə məsafəli işi zəruri etdiyini deyən Agentlik rəhbəri əlavə edib ki, müxtəlif iş yerlərində isə məsafəli işin başlaması və görülən işlərin daha səmərəli və məhsuldar ola bilməsi üçün həmin sahələrdə avtomatlaşdırmavə rəqəmsal texnologiyaların tətbiqivə xüsusən də keyfiyyətli tətbiqi üçün ciddi zəmin yaratdı: 

“Pandemiya səbəbindən iqtisadiyyatımızın və həyatımızın rəqəmsallaşmasının sürətləndirilməsi bir çox faydaları özündə birləşdirə bilər. Daha keyfiyyətli bir rəqəmsal infrastruktura investisiya qoymaq hər şeyi əhatə edən daha yaxşı imkanlar ekosistemi yaratmağa kömək edə bilər. İnsan kapitalımızı rəqəmsal bacarıqlara sahib edərək inkişaf etdirmək işlə təminatda yeni imkanlara üfüqaça bilər”.