Prezident İlham Əliyev “Azərbaycan Respublikasının Kosmik Agentliyi (Azərkosmos)” publik hüquqi şəxsin yaradılması haqqında Fərman imzalayıb. 

Valyuta.az xəbər verir ki, dövlət başçısı sənəddə, AR Konstitusiyasının 109-cu maddəsinin 32-ci bəndini rəhbər tutaraq, AR-da kosmik fəaliyyət sahəsində əldə edilmiş uğurların və inkişafın davam etdirilməsi, dünyada gedən sürətli texnoloji tərəqqidən ölkəmizin daha çox faydalanması, kosmik fəaliyyət sahəsində idarəetmə, tənzimləmə, əlaqələndirmə və nəzarət mexanizmlərinin təkmilləşdirilməsi məqsədilə qərara aldığını bildirib.

Sənəddə, “Azərkosmos” Açıq Səhmdar Cəmiyyətinin əsasında Azərbaycan Respublikasının Nəqliyyat, Rabitə və Yüksək Texnologiyalar Nazirliyinin tabeliyində “Azərbaycan Respublikasının Kosmik Agentliyi (Azərkosmos)” publik hüquqi şəxs (bundan sonra – Agentlik) yaradılması və agentliyin “Azərkosmos” Açıq Səhmdar Cəmiyyətinin hüquqi varisi olduğu, Cəmiyyətin hüquq və öhdəliklərinin, habelə əmlakının Agentliyə keçdiyi diqqətə çatdırılır. 

Fərmanla aşağıdakı hallar müəyyən edilir:

“Agentlik kosmik fəaliyyət sahəsində dövlət siyasətinin formalaşmasında və həyata keçirilməsində iştirak edən, bu sahədə tənzimləməni və nəzarəti, telekommunikasiya, Yer müşahidə və digər təyinatlı peyklərin orbitə çıxarılması, idarə edilməsi və istismarı sahəsində ümumdövlət və ictimai əhəmiyyət daşıyan funksiyaları həyata keçirən, beynəlxalq kosmik layihələrdə iştirak edən, müvafiq beynəlxalq təşkilatlarla və xarici dövlətlərin aidiyyəti dövlət qurumları ilə kosmosdan dinc məqsədlərlə istifadə sahəsində əməkdaşlıq edən publik hüquqi şəxsdir.

Agentliyin fəaliyyətinin təşkili və təmin edilməsi xərcləri peyk xidmətlərindən əldə olunan vəsait və qanunla qadağan olunmayan digər mənbələr hesabına maliyyələşdirilir”. 

Sənədə əsasən, Agentliyin fəaliyyətinə rəhbərliyi həyata keçirmək üçün 3 (üç) üzvdən – sədr və onun 2 (iki) müavinindən ibarət İdarə Heyəti yaradılır.

Fərmanla, Agentliyin təsisçisinin səlahiyyətlərinin həyata keçirilməsi aşağıdakılara həvalə edilib:

“Azərbaycan Prezidenti idarəetmə orqanlarının yaradılmasını, Agentliyin İdarə Heyəti sədrinin vəzifəyə təyin və vəzifədən azad edilməsini, Agentliyin yenidən təşkili və ləğvini həyata keçirir.

AR-nın Nazirlər Kabineti Prezidentlə razılaşdırmaqla, Agentliyin nizamnaməsinin təsdiq olunmasını və nizamnamə fondunun miqdarının müəyyən edilməsini, onların dəyişdirilməsini, eləcə də Agentliyin strukturunun təsdiqini və “Publik hüquqi şəxslər haqqında” AR Qanununun 3.3-cü maddəsinə uyğun olaraq Agentliyin mənfəətinin dövlət büdcəsinə köçürülməsi barədə qərar qəbul edilməsini təmin edir.

Fərmana əsasən, Nəqliyyat, Rabitə və Yüksək Texnologiyalar Nazirliyi (NRYTN), Agentliyin İdarə Heyəti sədrinin müavinlərinin vəzifəyə təyin və vəzifədən azad edilməsini, Agentliyin inkişaf istiqamətlərinin müəyyən edilməsini, illik maliyyə hesabatlarının təsdiqini təmin edir: 

“Həmçinin, Agentliyin təsərrüfat cəmiyyətlərinin yaradılmasına və ya onlarda iştirak etməyə, idarə, filial və nümayəndəliklərinin yaradılmasına razılıq verilməsini, xalis aktivlərinin dəyərinin 25 (iyirmi beş) faizindən artıq məbləğdə olan əqdin (xüsusi əhəmiyyətli əqdin), habelə aidiyyəti şəxslə dəyəri Agentliyin aktivlərinin 5 (beş) faizini və daha çox hissəsini təşkil edən əqdin bağlanılmasına razılıq verilməsini həyata keçirir”. 

Prezident İlham Əliyev Agentliyə aşağıdakı səlahiyyətləri verib:

“Əməyin ödənişi fondunun, işçilərin əməkhaqlarını (vəzifə maaşının, vəzifə maaşına əlavələrin, mükafatların və digər ödənişlərı) müəyyən etsin. O cümlədən “Hüquqi şəxslərin dövlət qeydiyyatı və dövlət reyestri haqqında” AR-nın Qanunu ilə müəyyən edilmiş qaydada dövlət qeydiyyatına alındığı günədək “Azərkosmos” Açıq Səhmdar Cəmiyyəti öz fəaliyyətini davam etdirsin”.

Nazirlər Kabinetinə tapşırılır ki, Agentliyin nizamnaməsini və strukturunu Azərbaycan Respublikasının Prezidenti ilə razılaşdırmaqla iki ay müddətində təsdiq etsin: 

“Həm də Agentlik dövlət qeydiyyatına alındığı gündən bir ay müddətində “Azərkosmos” Açıq Səhmdar Cəmiyyətinin balansındakı əmlakın Agentliyin balansına verilməsini təmin etsin. Prezidentin aktlarının bu Fərmana uyğunlaşdırılması ilə bağlı təkliflərini üç ay müddətində AR Prezidentinə təqdim etsin. Nazirlər Kabinetinin normativ hüquqi aktlarının bu Fərmana uyğunlaşdırılmasını üç ay müddətində təmin edib Prezidentə məlumat versin. Mərkəzi icra hakimiyyəti orqanlarının normativ hüquqi aktlarının və normativ xarakterli aktların bu Fərmana uyğunlaşdırılmasını nəzarətdə saxlasın və icrası barədə beş ay müddətində Azərbaycan Respublikasının Prezidentinə məlumat versin. Bu Fərmandan irəli gələn digər məsələləri həll etsin”.

Sənəddə vurğulanır ki, NRYTN, Agentliyin nizamnaməsinin və strukturunun layihələrini, habelə nizamnamə fondunun məbləğinə dair təkliflərini iki ay müddətində Azərbaycan Respublikasının Nazirlər Kabinetinə təqdim etsin:

“Agentliyin dövlət qeydiyyatına alınması üçün onun nizamnaməsi təsdiq edildikdən sonra üç gün müddətində “Hüquqi şəxslərin dövlət qeydiyyatı və dövlət reyestri haqqında” Azərbaycan Respublikasının Qanununa uyğun olaraq tədbirlər görsün. Bu Fərmandan irəli gələn digər məsələləri həll etsin”.