Cari ilin ilk 3 ayı ərzində Azərbaycandan digər ölkələrə 4 milyard 137 milyon 852.26 min ABŞ dolları dəyərində neft-qaz sektoruna daxil olan və olmayan məhsullar ixrac olunub. 

Dövlət Gömrük Komitəsindən Valyuta.az-a daxil olan məlumata görə, bu vəsaitin 3 milyard 636 milyon 348.88 min dolları neft-qaz sektoruna daxil olan mallar üzrə olub. 

Neft-qaz sektoruna daxil olmayan mallar üzrə ixrac əməliyyatlarının həcmi isə 501 milyon 503.38 min dollar dəyərində olub. 

İxrac olunan neft-qaz sektoruna daxil olan mallar üzrə bitumlu süxurlardan alınmış xam neft və xam neft məhsulları üstünlük təşkil edib. Belə ki bu dövrdə qeyd edilən məhsul 7 milyard 047 milyon 438.98 min ton həcmində olub və 2 milyard 664 milyon 616.28 min ABŞ dolları təşkil edib. 

İkinci sırada təbii qazın ixracı dayanır ki, bu da 6 milyard 165 milyon 450.44 min ton həcmində və 867 milyon 067.72 min dollar dəyərində olub. 

Neft-qaz sektoruna daxil olmayan mallar üzrə ixrac olunan məhsullar arasında meyvə-tərəvəz, bəzi qida məhsulları, alkoqollu və alkoqolsuz içkilər, kimya sənayesi məhsulları, sement, elektrik enerjisi, azot gübrəsi, Plastmassa və onlardan hazırlanan məmulatlar, pambıq lifi və digər məhsullar üstünlük təşkil edib.