Yapon nəhəngi Amerikada ixtisarlara hazırlaşır

"Nissan", mənfəət əldə edə bilmə səylərinin bir hissəsi olaraq ABŞ-dəki zavodlarında istehsalı azaldır və zavod işçilərinə təzminatlarını alaraq işdən çıxmaları təklifini irəli sürür.

Valyuta.Az xəbər verir ki, bu addım, "Nissan Motor Corp."un iki ay əvvəl elan etdiyi və Çin də daxil olmaqla, qlobal miqyasda 9.000 nəfərin işdən çıxarılmasını nəzərdə tutan planın bir hissəsi kimi qiymətləndirilir. Şirkət, satışların azalması və anbarlardakı artan məhsullar səbəbindən yaranan zərərdən sonra yenidən qurulma qərarı almışdı.

"Nissan"ın Tennessi ştatının Smirna şəhərindəki zavodunda istehsal xətlərindən biri iki növbədə fəaliyyətini davam etdirəcək, digər xətt isə tək növbəyə birləşdiriləcək. Smirna zavodu "Murano", "Pathfinder" və "Rogue" idman avtomobilləri, eləcə də "Infiniti QX60" lüks modelini istehsal edir. Missisipidə "Altima" sedan və "Frontier" pikap istehsal edən Kanton zavodunda "Nissan" bir xəttin istehsal sürətini azaldır və digərlərini birləşdirir. Tennessi ştatının Deçerd şəhərində mühərrik istehsal edən zavodda isə növbə tənzimləmələri daha mərhələli şəkildə həyata keçiriləcək. Bəzi sahələr qorunacaq, digərlərində isə bir növbə azaldılacaq.

Qlobal istehsal gücü 20% azalacaq...

"Nissan" noyabr ayında bərpa planını elan edərkən, ixtisarların konkret olaraq harada həyata keçiriləcəyi barədə təfərrüatlar verməmişdi. 9.000 nəfərlik ixtisar, şirkətin 133.000-dən çox qlobal işçisinin təxminən 6%-nə bərabərdir. Şirkət, eyni zamanda, qlobal istehsal gücünü 20% azaltmağı planlaşdırır.

“Nissan” 9 min işçisini ixtisar edir 

Yaponiyanın Yokohama şəhərində yerləşən "Nissan", son təkliflərin ümumi ixtisar planlarına daxil edildiyini və əməliyyatlarını daha səmərəli və çevik hala gətirmək məqsədilə hazırlandığını bildirib. Şirkət açıqlamasında, "Nissan performansını yaxşılaşdırmaq və bazardakı dəyişikliklərə sürətlə uyğunlaşa bilən daha çevik, daha dayanıqlı bir biznes yaratmaq üçün qlobal səviyyədə təcili tədbirlər görür" ifadələrinə yer verib.

"Nissan", oktyabr-dekabr ayları üzrə maliyyə nəticələrini 13 fevralda açıqlamağa hazırlaşır. Şirkətin ABŞ-dəki planları ilə bağlı xəbərlərin yayılmasından sonra "Nissan"ın səhmləri Tokio birjasında 2% artıb.

Rəhim