"TeklifimGelsin" 4 milyon dollarlıq investisiya aldı

Fərdiləşdirilmiş maliyyə platforması "TeklifimGelsin" 40 milyon dollar dəyərində qiymətləndirmə ilə 4 milyon dollarlıq A seriyalı investisiya turunu uğurla tamamlayıb. 

Valyuta.az xəbər verir ki, şirkətin baş direktoru İhsan Cem Zararsız bildirib ki, son 4,5 il ərzində "TeklifimGelsin" bu mərhələyə çatmaq üçün ümumilikdə 1,3 milyon dollarlıq investisiya cəlb edib.

2021-ci ildə təsis edilən "TeklifimGelsin" bu günə qədər 1,7 milyon qeydiyyatlı istifadəçiyə xidmət göstərdiyini açıqlayıb. İhsan Cem Zararsızın sözlərinə görə, şirkət 2026-cı ilin sonuna qədər 2,5 milyondan çox istifadəçiyə çatmağı hədəfləyir. O əlavə edib ki, "TeklifimGelsin" mövcud maliyyə həllərinə paralel olaraq, müxtəlif maliyyə qurumları ilə quracağı əməkdaşlıqlar vasitəsilə istifadəçilərin fərdi maliyyə ehtiyaclarını daha dərindən qarşılayacaq.

Şirkət, istifadəçilərə daha çox dəyər yaradan xidmətlər təqdim etmək məqsədilə məlumat gücünü süni intellekt texnologiyaları ilə birləşdirməyi planlaşdırır. Əsas məqsəd isə davamlı inkişafı təmin edən, ölçülə bilən nəticələrə əsaslanan artım strategiyasını həyata keçirməkdir.

Mayya Hüseynova