Son 5 ildə ən çox investisiya alan süni intellekt şirkətləri

Avropada süni intellekt (SI) sahəsinə investisiyalar rekord səviyyəyə çatıb. Fransa, Almaniya və Böyük Britaniya bu sahədə lider mövqedədir. 2021-ci ildə 2,2 milyard avro olan investisiya həcmi 2025-ci ilin ilk 10 ayında 4,6 milyard avroya yüksəlib.

Valyuta.az xəbər verir ki, son beş ildə Avropa ölkələrindəki süni intellekt startaplarına ümumilikdə 13,2 milyard avrodan çox sərmayə qoyulub. Fransa şirkətləri 4,1 milyard avro, Almaniya 3,4 milyard avro, Böyük Britaniya isə 2,5 milyard avrodan çox yatırım cəlb edib.

Ən iri sərmayələrdən biri 2025-ci ilin üçüncü rübündə Fransada yerləşən "Mistral AI" şirkətinə yönəlib. ASML və Nvidia-nın rəhbərlik etdiyi bu raundda şirkət 1,7 milyard avro cəlb edərək ilin ümumi yatırımlarının 37 faizini təkbaşına təşkil edib.

Ən çox investisiya alan süni intellekt şirkətləri

Mistral AI (Fransa)

"DeepMind", "Meta" və "Google"un keçmiş mühəndisləri tərəfindən yaradılan "Mistral AI" böyük dil modelləri üzərində ixtisaslaşıb. Şirkət “AI Studio”, “Le Chat” və “Mistral Code” kimi məhsullarla mətn, kodlama və avtomatlaşdırma sahəsində həllər təqdim edir. Bugünə qədər 2,8 milyard avro yatırım alan şirkətin dəyəri 11,7 milyard avroya çatıb.

Helsing (Almaniya)

2021-ci ildə qurulan "Helsing" müdafiə və təhlükəsizlik texnologiyalarında süni intellektdən istifadə edir. Şirkət 1,3 milyard avro investisiya cəlb edib. Hazırda “Saab” ilə əməkdaşlıq edir və dronlardan kosmik sistemlərə qədər geniş tətbiq sahəsinə malikdir.

UiPath (Rumıniya / ABŞ)

2005-ci ildə Buxarestdə qurulan UiPath robotlaşdırılmış proses avtomatlaşdırması (RPA) sahəsində dünya lideridir. Şirkət 2021-ci ildə 1,34 milyard dollar gəlirlə Nyu-York birjasında IPO həyata keçirib və hazırda 100-dən çox ölkədə fəaliyyət göstərir.

Poolside (Fransa)

2023-cü ildə yaradılan "Poolside" proqramlaşdırma proseslərini avtomatlaşdıran süni intellekt modelləri hazırlayır. Şirkət son 5 ildə 626 milyon dollar yatırım alıb. İnvestorlar arasında "NVIDIA", "Bain Capital Ventures" və "Bpifrance" var.

Aleph Alpha (Almaniya)

2019-cu ildə qurulan "Aleph Alpha" açıq və izah edilə bilən süni intellekt” konseptinə əsaslanır. Şirkətin “PhariaAI” platforması dövlət və biznes qurumlarına məlumat təhlükəsizliyi təmin edir. Aleph Alpha bu günə qədər 500 milyon avro yatırım alıb.

Synthesia (Böyük Britaniya)

Mətndən video yaradan "Synthesia" real avatar və səs klonlama texnologiyası ilə tanınır. Şirkət 485 milyon avrodan çox sərmayə toplayıb və dəyəri 4 milyard dollar olub. İnvestorlar arasında "Google Ventures" və "Kleiner Perkins" var.

DeepL (Almaniya)

2017-ci ildə qurulan "DeepL" süni intellekt əsaslı tərcümə və yazı texnologiyaları ilə məşhurdur. “DeepL Translator”, “DeepL Write” və “DeepL Voice” kimi məhsullarla fərqlənir. Şirkət son 5 ildə 400 milyon dollardan çox yatırım alıb.

ElevenLabs (Böyük Britaniya)

Mətindən səsə çevirmə və səs klonlama texnologiyasında ixtisaslaşan "ElevenLabs" 290 milyon dollardan çox yatırım toplayıb. 2025-ci ilin yanvarında keçirilən C raundunda şirkətin dəyəri 3,3 milyard dollar olub.

n8n (Almaniya)

2019-cu ildə yaradılan n8n, açıq mənbəli avtomatlaşdırma platformasıdır. "OpenAI" "Slack" və "Google" kimi platformalarla inteqrasiya təklif edir. Şirkət 240 milyon dollar investisiya alıb və 2025-ci ilin oktyabrında dəyəri 2,5 milyard dollar səviyyəsinə yüksəlib.

Stability AI (Böyük Britaniya)

“Stable Diffusion” modeli ilə tanınan "Stability AI" vizual və dil əsaslı generativ texnologiyaların açıq qaynaqlı inkişafını dəstəkləyir. Şirkət indiyədək 230 milyon dollardan çox sərmayə cəlb edib.