Şirkətdə standartlaşma hər zaman yaxşıdır?

“Şirkətdə standartların və qaydaların yaradılması heç şübhəsiz sistemli idarəetmənin əsasını təşkil edir. Standartlaşmanın şirkətə bir çox faydaları var: Planlama və nəzarət asanlaşır, çaşqınlıq və xaos azalır, avtomatlaşma asanlaşır, proseslərin keyfiyyəti artır, səhvlər azalır, xərclər azalır”.

Valyuta.az xəbər verir ki, bunu idarəçi, SAT Group şirkətinin həmtəsisçisi və biznes konsultant Anar Bayramov deyib.

A.Bayramovun sözlərinə görə, unutmamalıyıq ki, standartlar və qaydalar şirkətin yaxşılığı üçündür. Şirkətə pislik üçün deyil. İdarəçilər ayıq olmalıdırlar ki, standartlar və qaydalar şirkətə mənfi nəticələrə səbəb olmasın. Ona görə də həmin mənfi cəhətləri xatırlamaqda fayda var: “Çox standartlaşma bəzi hallarda işçilərin “robotlaşmasına” gətirib çıxarır. Bu halda yaradıcı yanaşma, təşəbbüskarlıq, kritik yanaşma arxa plana keçə bilər. Eyni zamanda, sərt standartların və “dəmir qayda”ların qoyulması bəzən şirkətin elastikliyinə mane olur. Nəticədə rəqabət qabiliyyəti azala bilir. Üstəlik, çox standart, qayda və prosedurların olması şirkətin reaksiya qabiliyyətini azalda bilir. İşi maraqsızlaşdıra, işçilərin motivasiyasını azalda bilir. Şirkətdə yersiz bürokratiya yarada bilir. Nəticədə sürət xeyli azalır və s”.

“Standartlar və qaydalar məqsəd deyil, vasitədir - alətdir. Heç bir halda şirkətin effektivliyini və səmərəliliyini axsatmamalıdır” – deyə A.Bayramov qeyd edib.