Şirkət 1,3 milyard qiymətləndirilmə ilə, 75 milyon dollar investisiya alıb

ABŞ mərkəzli "Scribe" şirkəti C seriyası investisiya turunda 75 milyon dollar sərmayə cəlb edib. 

Valyuta.az xəbər verir ki, iş proseslərinin optimallaşdırılması üzrə fəaliyyət göstərən "Scribe" 2024-cü ilin fevralında 25 milyon dollar sərmayə almışdı.

Bu dəfə isə şirkət daha böyük investisiya ilə gündəmə gəlib. 2019-cu ildə təsis olunan şirkətin ümumi dəyəri 1,3 milyard dollara çatıb.

Şirkət açıqlamasında yeni sərmayənin "Scribe Optimize" adlı alətin inkişafına yönəldiləcəyini bildirib. Bu alət əməkdaşların iş proseslərini təhlil edir və süni intellekt vasitəsilə avtomatlaşdırır.

"Scribe" şirkəti Cennifer Smit və Aaron Podolni tərəfindən təsis olunub. Şirkət müəssisələrdə proseslərin sənədləşdirilməsi və təlimlərin avtomatlaşdırılmasını təmin edir. "Scribe" platforması əməkdaşların tətbiq daxilində yerinə yetirdikləri əməliyyatları masaüstü müştəri və ya brauzer əlavəsi vasitəsilə qeydə alır. Daha sonra bu qeydlər ekran görüntüləri əsasında addım-addım təlimatlara çevrilir. Sistem eyni zamanda həssas məlumatları avtomatik şəkildə gizlədir.

İstifadəçilər bu təlimatlarda lazımsız addımları silə, redaktə edə və sənədləri PDF formatında və ya interaktiv bələdçi kimi paylaşa bilirlər. "Scribe"ın əsas məqsədi yeni əməkdaşların işə qəbul və təlim proseslərini sürətləndirmək, iş axınlarını standartlaşdırmaqla vaxt itkisinin və səhv ehtimalının qarşısını almaqdır.

Şirkətin məlumatına görə, bu yanaşma hər bir əməkdaşa ayda orta hesabla 35 saatlıq iş vaxtına qənaət imkanı yaradır. Eyni zamanda proqram təminatı şirkətləri "Scribe" platformasından müştəri dəstəyi proseslərini avtomatlaşdırmaq üçün də istifadə edə bilirlər. Beləliklə, istifadəçilər texniki dəstəyə müraciət etmədən mərhələli təlimatlarla problemlərini həll edə bilirlər.

Mayya Hüseynova