Rusiya rekord endirimlərlə neft satmağa başlayıb

Rusiya nefti son bir ilin ən kəskin endirim artımı ilə üzləşib – Baltik və Qara dəniz limanlarında Urals markalı neft üçün barel başına endirimlər təxminən 20 dollara çatıb.

Valyuta.az xəbər verir ki, bu barədə "Kommersant" məlumat yayıb.

Nəşrin sənayedən mənbəyə istinadən verdiyi məlumata görə Primorsk limanında FOB əsasında Rusiyanın Urals neftinə Brent neftinə nisbətən endirim 10 noyabra qədər barel üçün 19,4 dollara, Novorossiysk limanında isə barel üçün 19,4 dollara qalxıb.

"Kommersant" xatırladır ki, noyabrın əvvəlində endirimlərın həcmi barel üçün 13-14 dollar səviyyəsində idi, halbuki yeni Amerika sanksiyaları tətbiq olunmamışdan əvvəl bu rəqəm 11-12 dollar arasında olub.

Ekspertlər endirimləri Rusiya neft nəhənglərinə qarşı sanksiyalarla əlaqələndirirlər. Digərləri bazarın "heterojenliyinə" diqqət çəkirlər. Bəzi rusiyalı mütəxəssislər ixrac kanallarının yenidən qurulması zamanı endirimlərin daha da artacağını proqnozlaşdırırlar.

Qeyd edək ki, Urals neftinə Brentə nisbətən endirim maksimum dəyərlərə 2022-ci ilin ikinci rübündə – barel üçün 31,9 dollar və 2023-cü ilin birinci rübündə – barel üçün 30 dollar çatmışdı.

Birinci halda bazar müharibənin başlamasından sonrakı geosiyasi şokun təsiri altında idi, ikinci halda isə Avropa İttifaqının Rusiyadan dənizlə xammal tədarükünə qoyduğu embarqo öz rolunu oynamışdı.

Hal-hazırda Hindistan və Çin şirkətləri – Rusiya neftinin əsas alıcıları – Rusiya ilə yeni müqavilələr bağlamaqda getdikcə daha ehtiyatlı yanaşırlar.

Daha əvvəl məlum olub ki, beş böyük Hindistan neft emalı zavodu dekabr ayı üçün Rusiya neftinə sifariş verməyib. Adətən belə müqavilələr əvvəlki ayın 10-na qədər bağlanır. Çində Rusiya nefti almaqdan imtina edənlər arasında "Sinopec" və "PetroChina Co." adları çəkilirdi. Sonuncular böyük dövlət şirkətləridir.

Neft, sanksiyalar və müharibə

Xatırladaq ki, yaxınlarda Birləşmiş Ştatlar Rusiyaya qarşı - "Rosneft" və "Lukoil" şirkətlərinə toxunan yeni sanksiyalar tətbiq edib. Məhdudiyyətlər tətbiq olunan kimi şirkətlərin səhmləri sürətlə enməyə başlayıb. "Lukoil" həmçinin xarici strukturlarının fəaliyyətində problemlərlə üzləşib.

Norveçin "Gunvor" şirkətinin baş direktoru Torbjörn Törnqvistin bildirdiyinə görə, sanksiyalar nəticəsində indi "Lukoil"in bütün beynəlxalq fəaliyyəti iflic olunub.

Mütəxəssislər hesab edirlər ki, "Lukoil" və "Rosneft" şirkətlərinə qarşı ABŞ-ın yeni sanksiyaları Moskva üçün xoşagəlməz olsa da, fətal deyil. Hal-hazırda Trampın administrasiyasında Kremli sülhə getməyə məcbur edə biləcək yeni məhdudiyyətlər hazırlanır.

Paşa Məmmədli