"Asan İmza" necə əldə edilir?

Rəqəmsal dövrün tələblərinə uyğun olaraq, bir çox sənəd və əməliyyatlar artıq elektron qaydada həyata keçirilir. Elektron imza sistemlərindən biri olan "Asan İmza", dövlət və özəl qurumlarla rəqəmsal əməliyyatları sürətləndirmək, sənədləri elektron şəkildə imzalamaq və təhlükəsiz identifikasiya təmin etmək üçün geniş istifadə olunur. 

Valyuta.az "Asan İmza" əldə etmə qaydasını təqdim edir:

Vətəndaşların "Asan İmza" əldə etməsi üçün ilk olaraq hər hansı bir mobil operatorun (Azercell, Bakcell, Nar) müştəri xidmətləri mərkəzinə müraciət edərək "Asan İmza" SIM kartını əldə etmələri tələb olunur.

Bundan sonra həmin şəxs Dövlət Vergi Xidmətinin "Asan Sertifikat Xidmətləri Mərkəzi"nə müraciət etməlidir. Müraciət zamanı aşağıdakı sənədlər təqdim edilməlidir:

1.Şəxsiyyət vəsiqəsi (əcnəbilər və vətəndaşlığı olmayan şəxslər üçün müvafiq sənədlər)

2.Mobil operator tərəfindən verilmiş "Asan İmza" SIM kartı və onun müqaviləsi

3.Fərdi sahibkarlar üçün VÖEN

4.Hüquqi şəxslər üçün möhür.

Təqdim olunan sənədlərin düzgünlüyü yoxlanıldıqdan sonra vətəndaşla "Asan Sertifikat Xidmətləri Mərkəzi" arasında yazılı müqavilə bağlanır. Sertifikat təsdiqləndikdən sonra vətəndaşa həm kağız, həm də elektron formada təqdim edilir.

Qeyd edək ki, "Asan İmza" sertifikatlarının etibarlılıq müddəti 3 ildir. Müddət bitdikdə, istifadəçilər sertifikatlarını onlayn qaydada yeniləyə bilərlər.

Mənbə: Azərbaycan Respublikasının İqtisadiyyat Nazirliyi yanında Dövlət Vergi Xidməti.