“İpək Yolu Sığorta” ötən il kiçilib, gəlirləri 2 dəfədən çox azalıb

“İpək Yolu Sığorta” ASC 2024-cü ilin maliyyə nəticələrini açıqlayıb. 

Valyuta.az xəbər verir ki, ötən il gəlirlərinin kəskin azalmasına baxmayaraq sığorta şirkəti ili yüksək mənfəətlə başa vurub.  “İpək Yolu Sığorta”nın 2024-cü il üzrə mənfəəti 1,58 milyon manat təşkil edib ki, bu da əvvəlki ilə nisbətən 2,3 dəfə çoxdur. 

Maraqlıdır ki, mənfəətin kəskin artması fonunda sığorta şirkətinin gəlirləri 2023-cü ildəki 19,8 milyon manatdan ötən il 9,2 milyon manata enib. Bu isə 2,2 dəfə azalma deməkdir. Bununla belə, xərclər də kəskin azalıb və 19 milyon manatdan 7,25 milyon manata enib. Nəticə olaraq “İpək Yolu Sığorta”nın maliyyə mənfəəti 1,96 milyon manata bərabər olub ki, bu da 2023-cü ilə nisbətən 2,3 dəfə çoxdur. 2023-cü ildə bu rəqəm 836,5 min manat təşkil edib. 

Mənfəəti üzgüldürən olsa da, ümumilikdə sığorta şirkəti ötən il kiçilib. 1 yanvar 2025-ci il tarixinə “İpək Yolu Sığorta”nın cəmi aktivləri 23,39 milyon manat təşkil edib ki, bu da son bir ildə 26,5 % azalma deməkdir. 

Bundan əlavə, şirkətin cəmi öhdəlikləri 57% azalaraq 7,05 milyon manata enib. Cəmi kapitalı isə 5,8% artaraq 16,3 milyon manata yüksəlib.

Xatırladaq ki, "İpək Yolu Sığorta" 1995-ci ildə yaradılıb. Onun nizamnamə kapitalı 14,77 milyon manatdır. Şirkətin səhmlərinin 96,53%-i “ASG Business Aviation” MMC-yə, 3,47 %-i isə "Azərbaycan Hava Yolları" QSC-yə məxsusdur.