“Azərpoçt”un sədr əvəzi külli miqdarda cərimələndi

Mərkəzi Bank “Azərpoçt” MMC-də tematik yoxlamalar aparıb.

Valyuta.az-ın məlumatına görə, 2022 - 2024-cü il tarixləri arasındakı dövrü əhatə edən yoxlamalar zamanı MMC-də cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında qanunvericiliyin bir sıra tələblərinin pozulması faktları aşkar olunub.

Qanun pozuntuları ilə əlaqədar Mərkəzi Bank tərəfindən inzibati araşdırma başlanılmış, MMC-nin nümayəndələrinin iştirakı ilə görüşlər təşkil edilib. “Azərpoçt” MMC-nin İdarə heyətinin sədri vəzifəsini müvaəqqəti icra edən İsi Mustafayev barəsində İnzibati Xətalar Məcəlləsinin 598.1.1-ci maddəsi üzrə protokol tərtib edilərək baxılması üçün Bakı şəhəri Səbail Rayon Məhkəməsinə göndərilib. Məhkəmənin qərarı ilə, “Azərpoçt” MMC İnzibati Xətalar Məcəlləsinin 598.1.1-ci maddəsi ilə təqsirli bilinərək hər bir müştəriyə və əməliyyata görə 20 min, İnzibati Xətalar Məcəlləsinin 25.4-cü maddəsi nəzərə alınmaqla cəmi 50 min manat məbləğində inzibati cərimə edilib.

Qeyd edək ki, İnzibati Xətalar Məcəlləsinin 598.1.1-ci maddəsinə görə maliyyə institutları tərəfindən müştəri uyğunluğu tədbirlərinə, məlumat və sənədlərin saxlanılmasına və üçüncü şəxslərə güvənməyə dair tələblərə riayət olunmamasına, hər bir müştəriyə və əməliyyata görə vəzifəli şəxslər iki min manatdan dörd min manatadək məbləğdə, hüquqi şəxslər iyirmi min manatdan otuz min manatadək məbləğdə cərimə edilir.