Larri Ellison dünyanın ən varlı adamları siyahısında İlon Maskı keçə bilər

Dünən axşam saatlarında Amerikanın yüksək texnologiyalı "Oracle" şirkətinin səhmləri 30% bahalaşıb, bazar kapitallaşması isə 208 milyard dollar artaraq 878 milyard dollara çatıb. 

Valyuta.az xəbər verir ki, fond bazarı korporasiyanın süni intellekt texnologiyaları ilə bağlı əməliyyatlardan əldə edilən gəlirin inamlı artımı barədə məlumat verdiyi və yaxın gələcək üçün nikbin proqnoz verdiyi rüblük hesabatına belə reaksiya verdi. Ümumilikdə, ilin əvvəlindən "Oracle" səhmləri 45% bahalaşıb.

"Oracle"ın 41,5% payla ən böyük səhmdarı onun həmtəsisçisi, hazırda baş texniki direktor vəzifəsini tutan 81 yaşlı Larri Ellisondur. Şirkətin kotirovkalarında dünənki artımı nəzərə alsaq, Ellisonun şəxsi sərvəti təxminən 70 milyard dollar artaraq 364 milyard dollara çatıb.

Beləliklə, Larri Ellison sərvət baxımından "Bloomberg Billionaires Index"in dünyanın ən varlı adamları reytinqində birinci yerdə olan İlon Maska (384 milyard dollar) çox yaxınlaşıb. "Oracle" səhmləri artarkən, "Tesla" kotirovkaları düşür - bu il onlar artıq 20% ucuzlaşıb, İlon Maskın sərvətini 49 milyard dollar azaldıb.

Paşa Məmmədli