Kartdan karta köçürmələrə məhdudiyyətlərin tətbiq edilməsinin səbəbi nədir?

“Yelo Bank” kartdan karta köçürmələrə (card to card) məhdudiyyət tətbiq etməyə başlayıb.

Valyuta.az xəbər verir ki, həm "Yelo Light", həm "Premium", həm də "Infinite" kart sahibləri ay ərzində kartdan-karta 3 min manatdan artıq pulsuz köçürmə edə bilməyəcəklər.

Eyni limit  Yelo ATM-lərindən komissiyasız nağdlaşdırmaya da şamil edilir. “Card to card” limitləri aprel ayının 8-dən etibarən tətbiq ediləcək. 

Anoloji addımı bu ilin martında "Azər Türk Bank" da atıb. ATB “card to card” üzrə günlük 15 dəfə, ay ərzində isə 60 əməliyyat limiti müəyyən edib.

Görəsən, bəzi bankların kartdan karta köçürmələrə məhdudiyyətlər tətbiq etməsinə səbəb nədir?

Mövzu ilə bağlı Valyuta.az-a açıqlama verən iqtisadçı ekspert Fuad İbrahimovun fikrincə, kartdan karta köçürmələrə qoyulan məhdudiyyətlər iki məqsədə, vergidən yayınmaq və bank aktivindəki vəsaitlərin faiz gəlmədən digər dövriyyəyə keçməsinin qarşısını almağa xidmət edə bilər: 

“Hazırda “Card to card” addımları ilə çoxlu sayda vergidən yayınma prosesi gedir. İnsanlar kartla ödəniş, müəyyən bonus, keşbek qazanır. Qarşı tərəf isə vergidən yayınma məqsədilə həmin variantdan istifadə edir. 

Digər tərəfdən, bank “Card to card” edib, faiz götürmürsə, bankın aktivindəki vəsaitlərin digər dövriyyəyə keçməsi baş verir. Belə vəziyyət isə banklara sərf etmir. Ona görə də bir sıra banklar kartdan karta köçürmələrə məhdudiyyətlər tətbiq edir”.

Ramiz