Gələn il 10 000 mA·s batareyalı telefonlar adi hal olacaq

Məlumata görə, 2026-cı ildə 10 000 mA·s tutumlu batareyaya malik smartfonlar artıq qeyri-adi sayılmayacaq. 

Valyuta.az xəbər verir ki, tanınmış insayder "Digital Chat Station"un məlumatına görə, belə yüksək tutumlu akkumulyatorların istehsalı uğurla başa çatıb. 

Mənbənin sözlərinə görə, texnologiya artıq kütləvi istehsal üçün hazırdır və 2026-cı ildən etibarən bazarda geniş yayılacaq.
Xüsusilə, "Xiaomi" və "Honor" şirkətləri bu cür smartfonlar üzərində işləyir və sınaqları davam etdirir. Böyük ehtimalla, söhbət gələcək "Honor Power" və "Redmi Turbo" seriyalarının modellərindən gedir.

İstehsalçıların hazırkı planlarına əsasən, bu ölçüdə batareyalar əsasən orta səviyyəli smartfonlarda istifadə ediləcək. Bunun səbəbi ondan ibarətdir ki, 10 000 mA·s tutumlu akkumulyator korpus daxilində çox yer tutur. Buna görə də dizaynerlər müəyyən kompromislərə getməli olurlar – məsələn, daha az güclü prosessorlar, sadələşdirilmiş kameralar və soyutma sistemləri tətbiq edilir.

İnsayderin sözlərinə görə, 10 000 mA·s “son hədd” deyil və texnologiyanın inkişafı davam edəcək. Uzun müddət smartfonlarda 5000 mA·s tutumlu batareyalar istifadə olunurdu, lakin son illərdə Çin brendləri silikon-karbon batareyalara keçid edib və tutum 7000–8000 mA·s səviyyəsinə qədər yüksəlib.
Hazırda bir çox flaqman modellər hələ də 5000 mA·s həddini çətinliklə keçir. Məsələn, "Galaxy S25 Ultra" modelində 5000 mA·s batareya quraşdırılıb və sızan məlumatlara əsasən, bu göstərici "Galaxy S26 Ultra" modelində də qorunacaq.

Bundan başqa, ekspertlər dünyada ən yüksək avtonomluğa malik smartfonu müəyyən ediblər. Yeni "Oppo" flaqmanı orta yüklənmə şəraitində 21 saat 57 dəqiqə fasiləsiz işləmə nəticəsi göstərib ki, bu da rekord göstəricidir.

Paşa Məmmədli