"Firmus" 325 milyon dollar investisiya aldı

Avstraliyanın süni intellekt infrastrukturu sahəsində fəaliyyət göstərən "Firmus" şirkəti, ölkə miqyasında məlumat mərkəzləri şəbəkəsi qurmağı hədəfləyən "Project Southgate" təşəbbüsünü sürətləndirmək məqsədilə 325 milyon ABŞ dolları həcmində yeni sərmayə aldığını açıqlayıb.

Valyuta.az xəbər verir ki, bu sərmayə turunun ümumi dəyəri 500 milyon Avstraliya dollarına bərabərdir.

Sərmayə turuna daha əvvəl də "Firmus" dəstəkləyən "Nvidia" və "Ellerston Capital" şirkətləri yenidən qatılıb. Şirkətin yaydığı açıqlamada qeyd edilir ki, yeni maliyyə vəsaiti sahələrin inkişafı, infrastrukturun qurulması və süni intellekt fabrikaları üçün enerji razılaşmalarının sürətləndirilməsi məqsədilə istifadə olunacaq. Bu çərçivədə müəyyən bölgələrdə tutumun artırılması planlaşdırılır.

"Firmus"un əsas layihəsi hesab edilən "Project Southgate", "Nvidia" və "CDC Data Centres" ilə əməkdaşlıq çərçivəsində həyata keçirilir. Layihənin 2028-ci ilə qədər 1,6 giqavat gücə çatması nəzərdə tutulur. O, genişmiqyaslı süni intellektin təlimi və nəticə çıxarma (inference) iş yükləri üçün xüsusi olaraq hazırlanmış, yüksək sıxlıqlı və enerji səmərəliliyi yönümlü məlumat mərkəzlərindən ibarətdir.

"Firmus"un həmsədri Tim Rozenfeld süni intellekt infrastrukturuna olan tələbatın sürətlə artdığını vurğulayaraq, bu sərmayə turu ilə birlikdə tutumu daha sürətli, daha aşağı maliyyətlə və Avstraliyanın bərpa olunan enerji hədəfləri ilə uyğun şəkildə miqyaslandıra biləcəklərini bildirib. Digər həmsədr Oliver Körtis isə bu sərmayə ilə Tasmaniyadakı əsas kampusdan kənara çıxaraq materikdə yerləşən dörd əsas bölgəyə doğru genişlənməni sürətləndirdiklərini və miqyas, performans və davamlılıq baxımından yenidən dizayn olunmuş yeni bir süni intellekt infrastrukturu sinfi yaratdıqlarını qeyd edib.

Yerli xəbər mənbələrinə əsasən, bu son sərmayə turu "Firmus"un bazar dəyərini təxminən 6 milyard Avstraliya dollarına, yəni 3,9 milyard ABŞ dollarına yüksəldib.

Şirkət, yeni sərmayə ilə yalnız infrastrukturun qurulmasını deyil, eyni zamanda qabaqcıl istehsala yönəlmiş fəaliyyəti və yüksək ixtisaslı işçi qüvvəsini genişləndirməyi də hədəfləyir.

Mayya Hüseynova