Dünyanın ən varlı insanlarının yaşadığı şəhərlər

Dünyada sərvəti 30 milyon ABŞ dollarından çox olan insanların əsasən hansı şəhərlərdə toplandığı məlum olub.

Valyuta.az xəbər verir ki, bu barədə Altrata adlı beynəlxalq sərvət araşdırma şirkətinin yeni hesabatında bildirilir.

Araşdırmaya əsasən, dünyadakı ultravarlı insanların 19 faizi cəmi 10 şəhərdə yaşayır. Siyahıya Nyu-York, Honkonq və Los-Anceles başçılıq edir.

ABŞ şəhərləri üstünlüyünü qoruyur

Altratanın məlumatına görə, Nyu-York 21 380 ultravarlı sakini ilə dünyanın birinci şəhəridir.
İkinci yerdə Honkonq (17 215 nəfər), üçüncü yerdə isə Los-Anceles qərarlaşıb. İlk onluqda həmçinin San-Fransisko, Çikaqo, Tokio, London, Dallas, Vaşinqton və Hyuston şəhərləri yer alıb.

Ümumilikdə dünyadakı ultravarlı insanların 38%-i ABŞ-da yaşayır.

Hesabata görə, 2025-ci ilin iyun ayına olan vəziyyətə əsasən, qlobal miqyasda 510 min 810 nəfər sərvəti 30 milyon dollardan çox olan şəxs qeydə alınıb.
Bu göstərici 2004-cü ildən bəri böyüklər əhalisinin artım tempini 7 dəfə üstələyib.

Yeni mərkəzlər Asiyada formalaşır

Hesabatda qeyd edilir ki, sürətli zənginləşmə tempi artıq ABŞ-dən kənara keçib.

2030-cu ilədək ən sürətlə artan ultravarli əhali Oslo (Norveç), Bengaluru (Hindistan) və Haydarabad (Hindistan) şəhərlərində müşahidə olunacaq.
Bu göstəriciyə görə ABŞ şəhərləri ilk onluğa düşməyib.

Ultravarlı şəxslərin xərcləri 290 milyard dolları ötüb

Altratanın araşdırması həmçinin göstərir ki, dünyanın ən varlı insanları ötən il 290 milyard dollardan çox vəsaiti lüks məhsullara xərcləyiblər.

Ən çox xərclənən istiqamət nəqliyyat və səyahət olub.

Hesabatda bildirilir ki, lüks brendlər son illərdə məhz bu auditoriyaya fokuslanaraq fərdi xidmət modelləri formalaşdırır.

Sərvanə Rəmixanova