“Dünyada işdən çıxan insanların çoxunda rəhbərlərinin təsiri olur” – Təlimçi

Bir çox işçilər müxtəlif səbəblərdən öz fikirlərini rəhbərlərinə çatdıra bilmirlər. Ya öz fikirlərini bildirməyə çəkinir, ya da qəbul edilməz, narazılıq yaradar düşüncəsi ilə öz məsələlərini rəhbərliklə danışa bilmirlər.

Bəs işçilər öz fikirlərini, problemlərini, ideyalarını rəhbərliyə necə bildirməlidir?

Valyuta.az-a danışan idarəetmə üzrə türkiyəli təlimçi Ahmet Kandemir deyir ki, işçilər rəhbərləri ilə deyil, daha çox rəhbərlər işçilər ilə əlaqə qurmağa, daima ünsiyyətdə olmağa çalışmalıdır:

“İşçi hansı tərzdə əlaqə qursa da, əgər onun rəhbəri yeniliklərə, innovasiyaya açıq deyilsə, işçinin fikirlərini dəyərləndirməyə açıq bir şəxs deyilsə, işçinin yaradacağı əlaqənin heç bir faydası olmayacaq. İşçinin fikirlərini rəhbərlərinə çatdıra bilməməsinin əsas səbəbi rəhbərlərin idarə tərzləridir. Yaxşı bir idarəçi olmaq üçün işçilərlə açıq şəkildə əlaqə saxlamaq məcburiyyətindəsiz. İşçilərin gördüküləri işlərlə əlaqəli geridönüşlər etmək və onları dəyərləndirmək, onların işlə və rəhbərliklə əlaqəli fikirlərini almaq işə çox faydalı olacaq”.

Təlimçi qeyd edir ki, bizim işçilər ilə performans dəyərləndirmə kimi bir prosedurumuz yoxdur:

“Biz işçini dəyərləndirməyi “yaxşı işçi”, “can yandıran işçi” kimi subyektiv fikirlərlə müəyyən etdiyimiz üçün işçilərlə qarşılıqlı söhbət edib daha əvvəl müəyyən edilmiş bir performans dəyərləndirmə etmirik. Buna görə də, öz fikirlərimizi sübutlarla rəqəmlərlə onlara çatdıra bilmədiyimiz kimi, onların da bizə fikirlərini çatdıra biləcəyi imkanı yarada bilmirik”.

A.Kandemirin sözlərinə görə, bizim idarəçilərin bir çoxunun daha çoxunun öz mövqeyini qorumaq anlayışı olduğu üçün işçilərdən gələn yeni fikir və ideyaları riskli qəbul edə bilirlər:

“Buna görə də, işçinin fikirlərini görməzdən gələ bilirlər. Müxtəlif səbəblər göstərərək işçinin fikirlərinə etiraz edirlər. Bir müddət sonra da işçi fikirlərinə dəyər verilmədiyini, onun ortaya qoyduğu ideyaların diqqətə alınmadığını görən zaman da səssizləşməyə və performansının aşağı düşməsinə və yavaş-yavaş işdən uzaqlaşmasına səbəb olur.

Dünyada aparılan sorğular göstərir ki, dünyada işdən çıxanların 46 faizi rəhbərlərinin təsiri olduğu ortaya çıxıb. Yəni, şirkət nə qədər yaxşı olsa da, nə qədər yaxşı imkanlar təklif etsə də, işçilər rəhbərlərlə yola gedə bilmirsə, işi tərk edir. Rəhbərlərin davranışları işçilərin işdən çıxmasına əsas səbəbdir. Bu da, onu göstərir ki, biz işçilərdən daha çox rəhbərlərin üzərində çalışmalıyıq”.