Bakı bazarlarında qiymətlər niyə bahadır? (ŞƏRH)

“Bakıda qiymətlərin baha olmasının ən böyük problemlərdən biri fermerlərin ölkənin bazarlarına girişlərinin məhdud olmasıdır”.

Bunu Valyuta.az-a açıqlamasında iqtisadçı ekspert Akif Nəsirli deyib. Onun sözlərinə görə, bazarlarda piştaxta arxasında oturanlar özü üçün çörək pulu qazanır, bundan əlavə bazar rəhbərliyinə yer haqqı verir:

“Hər bazarın bir neçə tədarükçüsü var. Onlar rayonlardan məhsulu su qiymətinə alıb, Bakıda piştaxta arxasında duranlara 5 qat bahasına satır. Həmin adamlar da onlardan aldığı qiyməti iki dəfə  artırıb satır. Fermerin özünün Bakıya məhsul gətirmək imkanı yoxdur. Ona görə də bu gün Bakıda qiymətlər od tutub yanır”.

Akif Nəsirli qeyd edib ki, bu gün fermerlərin yetişdirdiyi məhsulların paytaxt bazarlarına çıxışı yoxdur:

“Paytaxt bazarlarında məlum insanlar piştaxta arxasında dayanıb mal satır. Həmin insanlara məhsul satışı birinci əldən gəlmir. Yəni fermer özü deyil, onlar da alverçilərdir. Bunun üçün bazarlarda monopoliya aradan qalxmalıdır. Bütün bazarlar fermerlərin üzünə açıq olmalıdır. Necə ki, sovet dövründə ölkənin bütün bazarlarına sadə vətəndaşların girişi məhdidiyyətsiz idi. Düzdür, onlar da müəyyən müqadrda pul ödəyirdilər. Sözsüz ki, bazarın saxlanması üçün pul ödənilməlidir. Hökumət fermerləri müdafiə etmək fikirindədirsə bazar xərclərini ödəyə bilər”.

Akif Nəsirli hesab edir ki, bu gün fermer malını özü Bakıya gətirə bilsə bazarlarda məhsul çox ucuz olar:

“Məsələn, bu il nar ucuz və bol oldu. Elə rayon oldu ki, orada narın bir kilosu 10 qəpikdən aşağı satıldı. Adam tanıyıram ki,  5-6 hektar nar bağını alverçilərə 500 manata satdı. Əgər fermerin Bakı bazarlarına giriş asan olsaydı narını gətirib burada satardı və 10 min manat xeyir qazanardı”.

Aylin