Alman şirkətləri iqtisadiyyata 631 milyard avro sərmayə qoyacaq

60-dan çox iri şirkət kansler Fridrix Merzin “Made for Germany” investisiya təşəbbüsünü dəstəkləyib və növbəti üç il ərzində Almaniya iqtisadiyyatına ən azı 631 milyard avro sərmayə qoymağa hazır olduqlarını bəyan ediblər. Hakimiyyət bunun ölkənin iqtisadi mövqeyini gücləndirəcəyini, artımı təmin edəcəyini və rəqabət qabiliyyətini artıracağını gözləyir.

Valyuta.az "Euronews"a istinadən xəbər verir ki, kanslerin təşəbbüsü üçün ad təsadüfən seçilməyib. Alman keyfiyyətinin simvolu olan "Made in Germany" ifadəsini xatırladır.

Təşəbbüsdə iştirak edən şirkətlər arasında "Siemens", BASF, BMW, "Volkswagen", "Mercedes-Benz", "Rheinmetall", SAP, "Airbus", "Deutsche Bank" və başqa nəhəng şirkətlər var. Təşəbbüs üçün qeydiyyatdan keçmiş bütün şirkətlərin Almaniya iqtisadiyyatındakı payı 30%-i ötür. Almaniyada fəaliyyət göstərən digər şirkətlərin də təşəbbüsə qoşula biləcəyi gözlənilir.

İnvestisiyalar yeni sənaye obyektlərinin tikintisinə və mövcud sənaye obyektlərinin genişləndirilməsinə, eləcə də tədqiqat və innovasiyalara yönəldiləcək. Euronews qeyd edir ki, bu cür inyeksiyalar Almaniya üçün çox aktualdır, çünki son iki ildə ölkə iqtisadiyyatı daralır. Almaniyanın 2025-ci ildə durğunlaşacağı, 2026-cı ildə isə cəmi 1% böyüməsi gözlənilir. Kansler Merzin sözlərinə görə, "Almaniya üçün hazırlanmış" təşəbbüsünə dəstək səviyyəsi "hissiyyatda dəyişiklik başlandığına və gücləndiyinə dair çox güclü siqnal göndərir. Mesaj aydındır: "Almaniya geri döndü. Yenidən investisiya qoymağa dəyər".

Paşa Məmmədli