Cənubi Koreyanın ən böyük aviaşirkəti olan "Korean Air" uzun illər davam edən alım prosesini yekunlaşdıraraq yerli rəqibi "Asiana Airlines Inc." şirkətini filial kimi öz strukturuna daxil edib. 

Valyuta.Az "Yonhap" agentliyinə istinadən xəbər verir ki, "Korean Air", "Asiana" tərəfindən buraxılmış 131,57 milyon yeni səhmi almaq üçün 1,5 trilyon won (təxminən 1,04 milyard ABŞ dolları) xərcləyib. Ümumi 1,8 trilyon won (təxminən 1,25 milyard ABŞ dolları) dəyərində olan birləşmə müqaviləsi çərçivəsində alınan səhmlər "Asiana"nın ümumi kapitalının 63,88 faizini təşkil edir.

Şirkət ilk dəfə "Asiana"nı əldə etmək niyyətini 2020-ci ilin noyabrında açıqlamış və ilkin addım olaraq 300 milyard won (təxminən 208 milyon ABŞ dolları) dəyərində "Asiana"nın müddətsiz çevrilə bilən istiqrazlarını almışdı.

Bütün zəruri rəqabət tənzimləmə qurumlarının, o cümlədən Avropa İttifaqının təsdiqini aldıqdan sonra "Korean Air" çərşənbə günü səhmlərin alınması prosesini tamamlayıb. Bu təsdiqləri əldə etmək üçün "Korean Air", "Asiana"nın yükdaşıma bölməsini satmaq və bəzi marşrutları digər daşıyıcılara təhvil vermək kimi bir sıra güzəştlər edib.

"İkiillik Birləşmə Sonrası İnteqrasiya" ("PMI") prosesindən sonra "Korean Air", "Asiana"nı tamamilə öz strukturuna daxil edəcək. 

Bundan əlavə, "Jin Air" şirkəti "Asiana"nın aşağı büdcəli hava yolları bölmələri olan "Air Seoul" və "Air Busan"ı özünə birləşdirəcək. "PMI" proqramı başa çatdıqdan sonra "Asiana", "Air Seoul" və "Air Busan" artıq fəaliyyət göstərməyəcək.

Maksimum biznes əməkdaşlığı əldə etmək üçün birləşmiş "Korean Air" eyni marşrutlarda vaxt intervallarını artırmağı, yeni istiqamətlər əlavə etməyi və mövcud işçi qüvvəsini "PMI" dövründən sonra qorumağı planlaşdırır.

Böyüdülmüş "Korean Air" sərnişin həcminə görə dünyada 12-ci ən böyük aviaşirkət olacaq. İki aviaşirkət balların çevrilmə nisbətini 2024-cü ilin iyun ayına qədər "İqtisadi Rəqabət Komissiyasın"a ("FTC") təqdim etməyi planlaşdırır.

"Asiana" 16 yanvar tarixində keçiriləcək fövqəladə səhmdarlar yığıncağında "Korean Air" tərəfindən təyin edilmiş yeni idarə heyəti üzvlərini təsdiqləməyi planlaşdırır.

"FTC" rəqabət narahatlıqlarını aradan qaldırmaq üçün "Korean Air"ə "Asiana"nı əldə etməsi şərti ilə bəzi düzəliş tədbirləri tətbiq edib. Bu tədbirlər çərçivəsində əsas marşrutlarda oturacaq tutumunun azı 90 faizinin qorunub saxlanılması tələb olunur. Həmçinin, "FTC" 40 marşrut üzrə oturacaq mövcudluğunun 2019-cu il səviyyələrinin 90 faizindən aşağı düşməməsini mandatlaşdırıb.

Rəhim