Azərbaycanda Çin avtomobillərinin gündən-günə populyarlığı və istifadə sayı artmaqdadır. Qiymətinə görə çox yaxşı spesifikasiyaya malik olan bu avtomobillər gələcəkdə digər ölkələrin avtomobil markaları ilə rəqabətə tab gətirib bazarda öz yerini möhkəmləndirə biləcəkmi?

Avtomobil Dilerləri Assosiasiyasının icraçı direktoru Eyyub Əliyev valyuta.az-a açıqlamasında qeyd  etdi ki, son illər Çin avtomobillərinin ölkəmizdə populyarlığı artıb: “Ölkəmizdə artıq rəsmi satış edən Çin markalarının sayı 15-ə çatıb. Bu, həmin avtomobillərə tələbin olduğunu göstərir. Avtomobillər istər interyer, istərsə də eksteryer baxımından çox cazibədardır”. 

Müsahib bildirdi ki, Çin markaları digər ölkələrin istehsalı olan avtomobillərin bazar payını getdikcə ələ keçirir: “Amma Çin markası olan avtomobillərin hamısının Azərbaycan bazarında yerini möhkəmləndirəcəyi də real deyil. Gələcəkdə bazarda yalnız servislərində xidmət keyfiyyəti və ehtiyat hissələri ilə tam təmin edə biləcək markalar yerini möhkəmləndirəcək. Artıq bir neçə Çin brendi sadaladığım hallar üzrə Koreya, Yaponiya və Avropa markaları ilə eyni səviyyədə fəaliyyət göstərir. Digərləri isə bu istiqamətdə işlər görürlər. Görünən odur ki, yaxın illərdə 7-8 Çin markası müştərilərə Avropa brendləri səviyyəsində xidmət göstərəcəklər. Özünü inkişaf etdirməyən brendləri isə bazarı tərk etmə riski gözləyir. Ona görə də, əsasən satış sonrası xidmət departamentinin inkişafına xüsusi diqqət ayırmalıdırlar”.

Qarakişi Vəlizadə