Bunu Qaynarinfo-ya açıqlamasında vəkil Əkrəm Həsənov iki gün əvvəl Bakı-Quba yolunda, Tağıyev qəsəbəsi ərazisində bir ailənin ölümü ilə nəticələnən qəza hadisəsində Azərbaycan Avtomobil Yolları Dövlət Agentliyinin ittiham olunmasından danışarkən deyib. Onun sözlərinə görə, nəinki dövlətin, istəlinən şəxsin günahı təsdiqlənirsə, onun əməli, hərəkəti, yaxud da hərəkətsizliyi nəticəsində vurulan zərərin əvəzini ondan tələb etmək olar:

 

"Amma bu məsələ elə də asan deyil. Ola bilər, onlar da deyəcək ki, məhz qəza nəticəsində yolun həmin hissəsinə müəyyən zərər vurulub. Biz də məcbur olub yolu təmir etdik. Burada əlaqə sübut olunmalıdır ki, bəli, yolda problem olduğundan hadisə baş verib. Ekspertlər cəlb olunmalıdır. Məsələnin həm də faktiki tərəfləri var. Nəinki dövlət orqanı, hətta özəl şəxslər belə ittiham olunan tərəf olanda bunu onlara sübut etmək çətin olur. Bizdə məhkəmə sistemi qənaətbəxş deyil. Hər şey  ekspertlərin rəyi əsasında həll edilir. Ekspertlər də istəlnən rəyi verə bilər. Dövlət orqanları isə həmişə sudan quru çıxmağı bacarır”.   

 

 

Nəqliyyat üzrə ekspert Elməddin Muradlı belə məhkəmədə vətəndaşın mütləq qalib gələcəyini deyib:

 

"Bu, hakimin vicdanına, ədalətinə baxır. O qədər vicdansız, rüşvətxor, korrupsioner hakimlər var ki, qərarı adamın üzünə baxa-baxa oxuyurlar. Vicdanlı hakim olsa, vətəndaşın xeyrinə qərar çıxaracaq. Qanunla yanaşanda hadisənin baş vermə səbəbi var və bu səbəb də yoldakı qüsurdur. Yolun da sahibi nəzarət edən dövlət qurumudur. Onlar vaxtında tədbir görsəydilər, bu və ya digər hadisələr baş verməzdi. Tək bu deyil, başqa hadislər də var. Ona görə onları məhkəməyə vermək lazımdır ki, məsuliyyətlərini dərk eləsinlər, gecə-gündüz yollarda yatsınlar ki, hər hansı bir problem yaranan kimi həll etsinlər. Bu gün qüsur yaranır, 5-10 nəfər ölür, sonra gəlirlər. Görün nə qədər harınlayıblar ki, insan həyatı onlar üçün dəyərsizdir. Onların əksəriyyətinin yoldan anlaşyışı yoxdur. Hamısını ora işə götürüb hərəsinə də bir vəzifə veriblər”.

 

 

Qeyd edək ki, iki gün əvvəl Bakı-Quba yolunda, Tağıyev qəsəbəsi ərazisində bir ailənin ölümü ilə nəticələnən yol nəqliyyat hadisəsi vaş verib. Nəqliyyat eksperti Elməddin Muradlı isə bu hadisədə Azərbaycan Avtomobil Yolları Dövlət Agentliyini ittiham edib. Ekspert bildirib ki, AAYDA yollarda ölüm mənbəyi yaradır, qanun qarşısında cavab verməlidir: "Yəni qəzaya səbəb olan amillər də nəzərə alınmalıdır. Hər halda, maşın heç nədən yoldan çıxıb aşmadı. Yolda ciddi qüsur var imiş. Bu səbəbdən də qəzada ölənlərin yaxınları savadlı bir vəkil tutub Agentliyi məhkəməyə verə bilər. Bu işdə həm təzminat davası açılmalıdır, həm də cavabdeh şəxslər cinayət məsuliyyətinə cəlb olunmalıdır”, - deyə ekspert bildirib.