Temperamentlər insan xarakterinin təməl xüsusiyyətlərini ifadə edən anlayışdır. İlk dəfə Hippokrat tərəfindən irəli sürülən temperament nəzəriyyəsi insanların dörd əsas qrupa bölünməsini təklif edir: sangvinik, xolerik, melanxolik və flegmatik. 

Valyuta.az xəbər verir ki, nəzəriyyə aktuallığını saxlamaqla yanaşı, iş seçimləri ilə də əlaqələndirilir. Hər temperament növü müəyyən güclü tərəflərə və zəifliklərə malikdir ki, bu da fərdlərin müxtəlif iş mühitlərinə uyğunluğunu təyin edə bilər.

Bunu da qeyd edək ki, insanlar müxtəlif temperament xüsusiyyətlərini birləşdirə bilər, bu da onların geniş iş seçimlərinə malik olduğunu göstərir.

Sangviniklər: Enerji və sosiallıq

Çevik, enerjili, ünsiyyətcil, emosional sabit sangviniklərin xüsusiyyətləri arasındadır. Onlar adətən optimist olurlar və çətin situasiyalarda pozitiv münasibətlərini qoruyurlar. Sangviniklər insanlarla sıx ünsiyyət tələb edən işlərə üstünlük verirlər. 

Uyğun peşələr:

Satış və marketinq
PR və kommunikasiya mütəxəssisi
Müəllimlik
Turizm və bələdçilik
Media və jurnalistika

Detallara diqqət yetirmək və uzun müddət monoton işlərlə məşğul olmaq sangviniklər üçün çətin ola bilər.

Xoleriklər: Liderlik və təşəbbüskarlıq

Xoleriklər enerjili, iradəli, məqsədli, riskə meyillidirlər. Çətinliklərlə mübarizə aparmağı sevirlər və liderlik xüsusiyyətlərinə malikdirlər.

Xoleriklər daha çox məsuliyyət və liderlik tələb edən işlərə meyilli olduqları üçün onlara uyğun peşələri aşağıdakı kimi sadalaya bilərik:

Menecment və idarəetmə
Sahibkarlıq və startap rəhbərliyi
İT layihə rəhbərliyi
Hüquq və siyasət
Hərbi və polis xidməti

Xoleriklər işlərə həddindən artıq fokuslandıqda, əməkdaşlarla münasibətlərdə bəzən sərt davranırlar.

Melanxoliklər: Analiz və yaradıcılıq

Melanxoliklər detallara böyük diqqət yetirir və yüksək səviyyədə dəqiqlik tələb edən işlərdə üstünlük qazanırlar. Buna əsasən də, həssaslıq, analitiklik, intizamlı və yaradıcı olmaq əsas xüsusiyətləri arasındadır.

Melanxoliklər yaradıcı və analitik sahələrə uyğun peşələrdə uğur qazana bilərlər. Məsələn:

Yazıçı və redaktor
Tədqiqatçı və analitik
İncəsənət (rəssam, musiqiçi, dizayner)
Mühasibatlıq və maliyyə analizi
Memarlıq və mühəndislik

Onlar üçün təhlükəli situasiya isə tez motivasiyalarını itirməkləri və risk almaqdan çəkinməkdir.

Flegmatiklər: Sabitlik və təşkilatçılıq

Flegmatiklər sakit, təmkinli, səbirli, əməkdaşlıq etməyi sevəndirlər. Bu temperamentə aid insanlar konfliktlərdən uzaq durmağa və harmoniya yaratmağa meyillidirlər.

Flegmatiklər sabitlik və komanda işi tələb edən peşələrdə parladıqları üçün onlara uyğun peşələri isə aşağıdakı kimi sadalaya bilərik:  

İnsan resursları mütəxəssisi
Müştəri xidməti
Psixoloq və sosial işçi
Tibb işçisi (həkim, tibb bacısı)
Müəllimlik və təlimçilik

Passivlik və təşəbbüskarlıqdan uzaq qalmaq onların zəif tərəfi ola bilər.

Maya Hüseynova