Yutubda Duq adı ilə videolar paylaşan həvəskar radio operatoru evindəki avadanlıqdan istifadə edərək Beynəlxalq Kosmik Stansiya (BKS) ilə əlaqə saxlamağı bacarıb.

Valyuta.az xəbər verir ki, Duq Beynəlxalq Kosmik Stansiyada (BKS) astronavtlarla əlaqə saxlayaraq qısa söhbət edib. Duq uzun müddətdir ki, bir astronavtla danışmaq istədiyini və əvvəllər dəfələrlə buna cəhd etdiyini deyib. 

"Yutub"da paylaşılan videoda onun əlaqə qurmazdan əvvəl astronavtı bir neçə dəfə çağırdığı görünüb. O, nəhayət, Vudi Hoburqla danışaraq arzusuna çatıb. Sonra dərindən gələn bir səs eyni zəng işarəsi ilə ona "Gəmiyə xoş gəlmisiniz" - deməklə cavab verib. "IFL Science"dəki xəbərə görə, Beynəlxalq Kosmik Stansiyadakı bir çox astronavt həvəskar radio operator lisenziyasına malikdir və tez-tez Yerdəki insanlarla planlaşdırılmış ünsiyyət seansları keçirir. Lakin, həvəskar operatorlar bəzən öz avadanlıqlarından istifadə edərək astronavtlarla danışmağı bacarırlar. Ancaq bu, yalnız BKS müəyyən yerlərdə olduqda mümkündür. Ona görə də operatorlar əllərində avadanlıq olsa belə dalğaların stansiyaya çatması üçün gözləmək məcburiyyətindədir. Həvəskar radio operatoru Mett Peyn və qızı İzabella da 2022-ci ilin avqustunda BKS-lə əlaqə qurmağı bacarmış və astronavt Kyell Lindqrenlə söhbət etmişdilər.

Mett "IFLScience"ə açıqlamasında həmin anları xatırlayarkən, "Planlaşdırılan məşq əlaqəsindən kənarda astronavtla danışmaq olduqca nadir haldır. Bunun baş verməsi üçün uyğunlaşmalı olan bir neçə amil var. Həmçinin plansız əlaqə yaratmaq üçün həvəskar radio avadanlığından fəal şəkildə istifadə edən bir astronavt olmalıdır. Bu olduqca uzun bir prosesdir, lakin görünür, bəzən işləyir"  - deyib.

Elmir